भांगरभूंय | प्रतिनिधी
भारताच्या 75 व्या प्रजासत्ताक दिसा निमतान पायनियर रीडर्स क्लब आनी एम. समाजीक सांस्कृतीक केंद्र, सोनशी, होंडा हांणी सद्भाव, पिलार पिलिग्रीम सेंटर, पिलार हांच्या पालवान होंडाच्या सुंदरम हॉलांत ‘सत्तरी- सद्भावना दीस’ मनयलो. सत्तरी- सभावना दीस हो सगल्यांनी एकठांय येवपाचो एक उपक्रम. वेगवेगळ्यो श्रद्धा आनी जिणे थरांतल्या लोकांक संवाद, चिंतन करपाक आनी विविधतायेंत एकचाराची भावना तिगोवन दवरपाचें उतर दिवपाक, तशेंच शांतताय, समरसताय वाडोवपाचे दिकेन वावुरपाक, एकचार निर्माण करपाक हो दीस आयोजीत केल्लो.
‘विविधताय आनी भावपण’ हो ह्या उत्सवाचो विशय आशिल्लो. ह्या संदर्भार वेगवेगळ्या समाजांतल्या तीन बायलां वक्त्यांनी विचार मांडलें. शिरीन एस शेख, (सहाय्यक प्राध्यापक, नारायण झांट्ये कॉलेज, दिवचल) हांणी ‘धार्मिक विविधतायेचो आदर’; नमन सावंत धावस्कार, (लेखक आनी समाजीक वावुरपी) हांणी ‘शांती आनी समरसताये खातीर शिक्षण’ आनी ग्वादालूप डायस (कवी, साहित्यीक) हांणी ‘गोंयांत समाजीक आनी धर्मीक एकचार राखप’ ह्या विशयाचेर उलोवप केलें.
कार्यावळीचे सुरवेक सहभाग आनी एकचाराची कुरू म्हणून मानेस्तांनी हॉलांत खासा दवरिल्ल्या वनस्पतीक उदक घालें. उपरांत रेव्ह फादर. डाॅमिनिक आल्वारीस (पायनियर रीडर्स क्लबाचे संचालक) हांणी सोसायटीन सत्तरी, खास करून सोनशेच्या लोकां खातीर फाटलीं तीन वर्सां केल्ल्या वावराचेर उलोवप केलें. लोकां कडल्यान आमकां खूब आदर आनी आदार मेळ्ळा, अशें तांणी सांगलें.
सद्भवाचे निमंत्रक रेव्ह. एल्विस फर्नांडीस हांणी आपल्या मुखेल उलोवपांत भारताच्या भांगराळ्या दायजाचेर आनी भारतीय संविधानांत आस्पाव केल्ल्या मुल्यां विशीं सांगलें. “आमी एकठांय आयल्यात विविधतायेंतल्या एकचाराची भावना सांबाळपाचें उतर दिवपाक आनी शांतताय आनी एकचार वाडोवपा खातीर वावुरपाक. दरेकल्यान ते नदरेन वावर करपाक जाय”.
मुखेल सोयरे राजेंद्र केरकार (लेखक आनी पर्यावरणवादी) हांणी सांगलें, “गोंयांत आमकां एकचार, समरसतायेचीं असंख्य आनी प्रेरणादायक उदाहरणां मेळटात”. हें व्हडलें दायज सांबाळून दवरपाक आनी फुडले पिळगे मेरेन तें पावोवपाक सगल्यांनी हातभार लावचो, असो उलो तांणी मारलो.
मानाचे सोयरे सोसायटी ऑफ पिलारचो केंद्रीय प्रतिनिधी सुपीरियर रेव्ह. फादर जोसेफ फर्नांडीस हांणी सांगलें की ‘देवाचीं भुरगीं जावन एकचार आनी शांतीपणान जगपाची जापसालदारकी आमच्या सगळ्यांचेर आसा”
ह्या वेळार रेव्ह. फादर मॅथ्युस फर्नांडीस, प्रकाश गांवस, सरपंच शिवदास माडकार हांचीं भाशणां जालीं.
पायनियर रीडर्स क्लब आनी समाजीक- सांस्कृतीक केंद्राच्या विद्यार्थ्यांचो एक भक्ती नाच; पथनाट्य, ‘शांती मोगी समुदाय आमकां जाय’ हें डॉ तन्वी कामत बांबोळकार हांणी बरयल्लें आनी तन्मय नायक हांणी दिग्दर्शीत केल्लें नाटक श्री शिव चिदंबर सांस्कृतीक कला मंडळ, डिगणें- कुडणे हांणी सादर केलें.
रेव्ह फादर जाॅर्ज नंदियाला हांणी बरयल्ली मनीसपणाच्या विशयाचेर आदारिल्ली कव्वाली पायोनियर रिडर्स क्लब आनी केंद्रान सादर केली. प्रथमेश नायकाचें संगीत आसलें. प्रांजल गांवस आनी प्राजक्ता गांवस हांणी देशभक्तीपर नाच सादर केलो. ‘लेट देयर बी लव, जॉय अँड होप’ हें गट गीत भिरोंडेंच्या पेट्रीसन आंद्रादाच्या फुडारपणा खाला डेस्टिनी म्युझिक अॅकॅडमीन सादर केलें.
सोनशी, होंडा, वाळपय, भिरोंडं आनी सांखळेचे साबार लोक हाजीर आशिल्ले. फादर जॉर्ज नंदियाला हांणी उपकार मानले. ऐश्वर्या च्यारी हाणें पुराय कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
