भांगरभूंय | प्रतिनिधी
दरेक म्हयन्याक दिवची पडटली वितरीत, थकीत रिणा सयत वसुलीय म्हायती
पणजी: गोंयांतल्या सहकारी सोसायट्यां मदल्या ‘एनपीए’ खातीं आनी थकीत रिणांचो आंकडो वाडत आसा. ह्या सोसायट्यांचेर नियंत्रण दवरपाक सहकार खात्यान अॅपची तयार सुरू केल्या. सगल्याच सहकारी सोसायट्यांक दरेक म्हयन्याक ह्या अॅपाचेर सोसायटीची रिणां, वसुली हे विशींची म्हायती दिवप सक्तीचे आसतले. हे अॅप मार्च पसून सुरू जावपाची शक्यताय आसा.
सहकार खात्या खाला येवपी सगल्याच संस्थांतल्या विवीध प्रकारच्या थकीत रिणांत वाड जायत आशिल्ल्यान ‘एनपीए’ त वचपी बँक खात्यांच्या संख्येंत दरवर्सा चाड जायत आसा. ताचो व्हड फटको सहकारी सोसायट्यांक बसता. शून्य ‘एनपीए’ खातीर सरकारान विवीध मार्गांन यत्न चलयल्यात. ताचोच भाग म्हूण भांगर आनी मालमत्ता तारण दवरून रीण आनी वन टायम सेटलमेंट येवजणेंत (ओटीएस) हाडल्या. सहकार खात्यां कडेन नोंदणी अाशिल्ल्या विवीध प्रकारच्या 5,203 सहकारी सोसायट्यांतल्या थकीत रिणांचो आंकडो 2021-22 त सुमार 4,420 कोटी अाशिल्ल्याचे मुखार आयलां. रीण फारीक करिनात तांचे आडची प्रक्रिया सहकारी सोसायट्या कडल्यान सावकाश गतीन सुरू आसा. ताका लागुनूच सगल्याच सहकारी सोसायट्यांतली थकीत रिणांत दरवर्सा वाड जायत अाशिल्ल्याचे दिसून येता.
ते खातीर खात्यान तांच्या कारभाराचेर नियंत्रण दवरपाक ह्या अॅपची तयारी सुरू केल्ल्याची म्हायती खात्यांतल्या सुत्रांनी दिली. दरेक सहकारी सोसायटींक दरेक म्हयन्याक वितरीत रिणां, थकीत रिणां, तशेंच वसुली संदर्भांतलो डेटा ह्या अॅपाचेर डावनलोड करचो पडटलो. सहकार खातें दरेक म्हयन्याक ताचो नियाळ हेवन थकीत रिणांचें प्रमाण उणें करपाचो यत्र करतली, अशेंय सुत्रांनी सांगलें.
…………………….
मुखेल सोसायट्यांतलीं थकीत रिणां (कोटींत)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
