भांगरभूंय | प्रतिनिधी
भांगरभूंय । खबरां मेज
पणजीः उत्तर प्रदेश सरकारान जे तरेन हलाल उत्पादनांची निर्मणी, साठवणूक आनी विक्रीचेर बंद घातल्या तशी गोंयांत घालची तशेंच हलाल प्रमाणपत्र दिवपी संस्थांचेर कारवाय करची अशी मागणी हिंदू जनजागृती समितीन केल्या.
समितीच्या शिश्टमंडळान पर्यटनमंत्री रोहन खंवटे, भाजपाचो वास्कोचो आमदार कृष्णा साळकार, मुरगावचो आमदार संकल्प आमोणकार, साळगावचो आमदार केदार नायक, पेडण्याचो आमदार प्रवीण आर्लेकार, मांद्रेचो आमदार जीत आरोलकार, मयेंचो आमदार प्रेमेंद्र शेट आनी दिवचलचो अपक्ष आमदार डॉ. चंद्रकांत शेट्ये हांकां निवेदना सादर करून ही मागणी केल्या.
निवेदनांत म्हणलां की गोंयांत हलाल प्रमाणीत खावपाचे जिनस, सौंदर्य प्रसाधना, वखदा, सुकोमेळो, मिठाय, धान्य, तेल, साबण, शॅम्पू, टुथपेस्ट, नेपपॉलीश, लिपस्टीक ल्हान दुकांना तें मॉलांनी विकतात. तांचो दर्जो निश्चीत करपाचें काम अन्न सुरक्षा कायद्याचें कलम 89 आनी भारतीय अन्न सुरक्षा मानक प्राधिकरण (एफएसएसएआय) आनी गोंय सरकाराच्या अन्न आनी वखदां प्रशासन हाचे वरवीं जाता. फकत धर्माच्या आदारार तयार केल्ली हलाल प्रमाणपत्र वेवस्था हेर समाज घटकांचेर थापल्या, हिंदू आनी मुसलमानेतर लोकांक हलाल प्रमाणीत उत्पादना घेवपाक लाप हे तांच्या धर्मीक अधिकारांचेर गदा हाडपी आसा अशें ह्या निवेदनान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
