भांगरभूंय | प्रतिनिधी
भांगरभूंय । खबरां मेज
पणजीः कदंब म्हामंडळाचे ड्रायव्हर आनी कर्मचारी संघटनेचो अध्यक्ष चंद्रकांत चोडणकार हाच्या फुडारपणा खाला एका शिश्टमंडळान विरोधी पक्ष फुडारी युरी आलेमांक हांका एक निवेदन सादर करून विधानसभेच्या येता त्या अधिवेशनांत तांचे प्रश्न मांडपाची विनवणी तांका केली. ह्या वेळार केपेंचो आमदार एलन डिकॉस्ता हाजीर आशिल्लो. कर्मचाऱ्यांचे प्रस्न विधानसभेंत मांडपाचें आस्वासन आलेमांव हांणे शिश्टमंडळाक दिला.
फाटली थकबाकी दिवप, वट्ट पगाराचेर 12 टक्के प्रोव्हिटन्ट फंड दिवप, कदंब येरादारी म्हामंडळाक 250 नव्यो बशी बेगोबेग घेवपाक सांगप, आंतरराज्य मार्गाचेर बस सेवेचें आवटसोर्सिंग थांबोवप, म्हजी बस येवजण बंद करपाची मागणी निवेदनांत केल्या. युरी आलेमांव हांका मेळपाक गेल्ल्या शिश्टमंडळांत नेसेमेंतो लोबो, उल्हास नायक, मनीष तांडेल, सुचिता ढाकणकार, आत्माराम गांवस आनी संजय आमोणकार हांचो आसपाव आशिल्लो.
7व्या वेतन आयोगाच्यो शिफारसी लागू केल्या तरी कंदब वेवस्थापनाक कर्मचारी संघटनेक वांगडा घेवंन वेतन कबलातीर सयो केल्यो नात आनी 7व्या वेतन आयोगाची 34 म्हयन्यांची थकबाकी अजून दिली ना अशें निवेदनांत नमूद केलां. 400 तल्यो 184 बशी कावलांत काडटले. ताका लागून म्हामंडळाक कडेन फकत 216 बशी आसतल्यो. अर्थसंकल्पांत तजवीज करून 250 बशी बेगीन घेवपाची मागणी संघटनेन केल्या. गोंय- शिर्डी आनी गोंय-मुबय हे रस्ते फायद्याचे आसात मात तांचे आवटसोर्सिंग केला. नव्या लक्झरी बशी विकत्यो घेवंन ह्या मार्गार कदंबाच्या बशी सुरू करपाचीय मागणी निवेदनांत आसा.म्हजी बस येवजणेक कर्मचारी संघटनेन खर विरोध केला. कदंब म्हामंडळ आनी ताच्या कर्मचाऱ्यांच्या हिताची ही येवजण ना अशें निवेदनांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
