भांगरभूंय | प्रतिनिधी
भांगरभूंय । प्रतिनिधी
फोंडेंः फोंडें तशेंच शेजारच्या तालुक्यांतल्या प्राथमीक भलायकी केंद्रांत जाय ती साधन सुविधा उपलब्द करून दुयेंतीक बरी सेवा दिवपाचो सरकाराचे यत्न चल्ल्यात. फोंड्यांतल्या उपजिल्हो हॉस्पिटलांत सर्जन दोतोराचे नेमणुकेचे सगले सोपस्कार पुराय केल्या. ह्या हॉस्पिटलाक मड्यांची येरादारी करपा खातीर हर्स व्हॅन दितले अशें भलायकी मंत्री विश्वजीत राणे हाणे सांगलें.
फोंड्यांत प्रधानमंत्री भारतीय जन वखदी केंद्राच्या उक्तावण कार्यावळीत राणे उलयताले. ह्या वेळार फोंड्याचो आमदार आनी कृशी मंत्री रवी नायक, आदलो खासदार नरेंद्र सावयकार, फोंड्याचो नगराध्यक्ष रितेश नायक, हॉस्टिटलाची अधिक्षक डॉ जयश्री मडकयकार, वखदी केंद्राचो धनी प्रभाकर येरूलकार हाजीर आशिल्लो.
पंतप्रधान नरेंद्र मोदी हांच्या फुडारपणा खाला केंद्र सरकार लोकांक जाय त्यो सुविधा सवाय दरांत उपलब्द करूनद दिवपाचे यत्न करता. ताका लागून प्रधानमंत्री भारतीय जन वखदी केंद्र सुरू केलां. ताचो लाब लोकांक मेळटलो अशें सांगतना लोकसभा वेंचणुके उपरांत नरेंद्र मोदी परत देशाचे पंतप्रधान जातले असो हावेस राणेन उक्तायलो.
आदलो खासदार नरेंद्र सावयकार, नगराध्यक्ष रितेश नायक हांणी आपले विचार मांडले. धनश्री येरुलकारा सुरवेक सगल्यांक येवकार दिलो. नताशा येरूलकारान उपकार मानले. कार्यावळीचें सूत्रसंचालन नितीन कोलवेकारान केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
