भांगरभूंय | प्रतिनिधी
दिग्गज बॅट्समन विराट कोहली आनी लोकेश राहुल हे सध्या पंगडांत नाशिल्ल्यान तांचे गैरहाजेरेंत ओपनर शुभमन गील आनी श्रेयस अय्यर हांकां पंगडांतल्यान भायर बसोवपाक फावना. दिग्गज खेळगड्यांचे गैरहाजेरेंत गील आनी अय्यर हांचो अणभव पंगडाक फायदेशीर थारतलो अशें भारताचो आदलो अश्टतासांचो खेळगडो इरफान पठाणान म्हणलां.
हैदराबादांत जाल्ले माळेंतले पयले टॅस्टींत गील 23 आनी शुन्याचेर जाल्यार अय्यर 35 आनी 13 धांवड्यो करून बाद जाल्लो. भारताक ती मॅच 28 धांवड्यांनी वगडावची पडिल्ली.
दुसरी मॅच फाल्यांच्यान विशाखापट्टणमांत सुरू जातली. हे मॅचींत कोहली, राहुल आनी रवींद्र जडेजा खेळचो ना. हे फाटभुंयेर नवोदीत सरफराज खानाक निमाण्या इकरांत सुवात दिवपाचो निर्णय पंगडाक म्हारग पडुये अशें पठाणाक दिसता.
कोहली सारक्या अणभवी खेळगड्याचे गैरहाजेरीक लागून खूब फरक पडला. लोकेश राहुल लेगीत जखमी आसा. ताका लागून पंगड वेवस्थापनाक निमाण्या इकरांत कोणांक खेळचे हे विशीं खर विचार करचो पडटलो अशें ताणें मुखार म्हणलें.
गील आनी अय्यर फाटल्या कांय दिसां सावन फॉर्मांत ना. हातूंत मातूय दुबाव ना. पूण, तांणी केन्नाच बरो खेळ करूंक ना अशेंय बी ना. पंगड वेवस्थापन निमाण्या इकरांत नव्या खेळगड्याचो आस्पाव करपाक सोदता जाल्यार सरफराज खान आनी रजत पाटीदार हातूंतलो एक पर्याय आसतलो. दोगांयनी देशांतर्गत क्रिकेट सर्तींत धांवड्यांचो पावस घाला अशें पठाणान म्हणलें.
सध्या भारता मुखार खर आव्हान आसा. हे फाटभुंयेर भारत अणभवी खेळगड्यां सयत वतलो अशें आपल्याक दिसता अशें पठाणान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
