भांगरभूंय | प्रतिनिधी
मडगांवः प्रधानमंत्री नरेंद्र मोदी हांची सभा आनी विकसीत भारत विकसीत गोंय प्रदर्शन मडगांवां जातलें. ते निमतान प्रदर्शनाचे सुवातेर जाल्ल्या कामांचो नियाळ, येरादारी वेवस्था, पार्कींग वेवस्था हांचो नियाळ दक्षीण गोंय जिल्होधिकारी अश्वीन चंद्रू हांणी घेतलो. ह्या वेळार येरादारेची कोंयडी जावची ना असो आराखडो तयार करपा सयत बसस्टॅण्डाच्या स्थलांतरी विशीं चर्चा जाली.
दक्षीण गोंय जिल्होधिकारी कार्यालयांत विवीध खात्यांच्या अधिकाऱ्यांची बसका आयोजीत केल्ली. तातूंत जिल्होधिकारी कार्यालयांतल्या प्रशासकीय अधिकाऱ्यां सयत येरादारी खातें, भौशीक बांदकाम खातें, वीज खातें, घनकोयर वेवस्थापन, मडगांव पालिका, कदंब म्हामंडळ आनी हेर अश्या 20 परस अदीक खात्यांचे अधिकारी हाजीर आशिल्ले. पणजे सकाळीं सभे निमतान मुख्यमंत्र्यांचे हाजिरेंत नियाळ बसका घेतली. ते खातीर जिल्होधिकारी हाजीर आशिल्ले. थंय जाल्ले चर्चे वेळार आनी सुचोवण्यांची म्हायती जिल्होधिकाऱ्यांनी हाजीर आशिल्ल्यांक दिली.
कोलवें सर्कल ते कलेक्टर रस्तो करतले बंद
प्रधानमंत्री नरेंद्र मोदी सभेचे सुवातेर पावले उपरांत कांय काळा खातीर कोलवें सर्कल ते दक्षीण गोंय जिल्होधिकारी कार्यालया मेरेनच्या रस्त्या वयली येरादारी बंद करतले. ते खातीर अंतीम येरादारी वेवस्था आराखडो तयार जाले उपरांत ते विशीं निश्चीत सांगपाक मेळटलें, अशें जिल्होधिकारी चंद्रू हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
