भांगरभूंय | प्रतिनिधी
डॉ. प्रकाश पर्येंकार: सोहिरोबानाथ आंबिये म्हाविद्यालयांत निबंध लेखन कार्यशाळेचें आयोजन
कोरगांव: बरें लेखन करपा खातीर पयलीं वाचन करप गरजेचें आसा अशें मत साहित्य अकादेमी पुरसकार जैतिवंत डॉ. प्रकाश पर्येंकार हांणी उक्तायलें. ते संत सोहिरोबानाथ आंबिये कला आनी वाणिज्य म्हाविद्यालय पेडणेंच्या कोंकणी आनी मराठी विभाग तशेंच साहित्य मंथन सत्तरी हे संस्थेच्या जोड पालवान आयोजीत केल्ले निबंद लेखन कार्यशाळेच्या कार्यावळी वेळार उलयताले.
हे कार्यशाळेचें निमित्त सादून म्हाविद्यालयाच्या कोंकणी तशेंच मराठी विभागान साहित्य अकादेमी पुरस्कार जैतिवंत डॉ. प्रकाश पर्येंकार हांचो भोवमान केलो.
ह्या वेळार माचयेर म्हाविद्यालयाच्यो उपप्राचार्य डॉ. ल्युसी जेम्स, कोंकणी विभाग सहाय्यक प्रा. मानसी धावस्कार, मराठी विभाग मुखेली निता तोरणें, कार्यशाळेचे मार्गदर्शक गोंय विद्यापिठाचे सहाय्यक प्राध्यापक चिन्मय घैसास, साहित्यीक नमन धावस्कार आनी साहित्य मंथन संस्थेचे अध्यक्ष काशिनाथ नायक हाजीर आशिल्ले.
कार्यशाळेच्या पयल्या सत्रांत सहाय्यक प्राध्यापक चिन्मय घैसास हांणी विद्यार्थ्यांक निबंद लेखनाचे विवीध प्रकार, निबंद लेखकाच्या आंगांत आशिल्ले गरजेचे गूण, निबंद लेखनाचे स्वरूप ह्या विशयाचेर विस्तारान म्हायती दिली. तशेंच निबंद लेखन ही एक कुशळटाय आसा. ती विकसीत करपा खातीर वाचन आनी सराव करपूय गरजेचो आसा. आपणें बरयिल्लो निबंद हो हेरांक वाचूंक दिवचो जाका लागून तातूंत आशिल्लो उणाव समजतलो अशें मत तांणी उक्तायलें.
दुसऱ्या सत्रांत साहित्यीक नमन धावस्कार हांणी विद्यार्थ्यांक मार्गदर्शन करतना सांगलें की, निबंद लेखकाचें मन हें संवेदनशील आसप गरजेचें आसा. कारण ताचे कडेन समाजांतल्या उपेक्षितांच्यो समस्या, जाणिवो मांडपाची तांक आसता. तशेंच विद्यार्थ्यांनी एखादो विशाय सुचयल्यार ताचेर लेखन करचें आनी उपरांत ताचें पुनरावलोकन करचें अशें मत तांणी मांडलें.
कार्यशाळेचें प्रास्तावीक मराठी विभाग मुखेली डॉ. निता तोरणे हांणी केलें. येवकार म्हाविद्यालयाच्यो सहाय्यक प्राचार्य डॉ. ल्युसी जेम्स हांणी दिलो. उपकार सहाय्यक प्राध्यापक कोंकणी विभाग मुखेली मानसी धावस्कार हांणी मानले. मार्गदर्शकांची वळख सहाय्यक प्राध्यापक अस्मिका पायनायक, आनी सहाय्यक प्राध्यापक अनिजा शिरोडकार हांणी करून दिली. सत्कारमुर्ती डॉ. प्रकाश पर्येंकार हांची वळख सहाय्यक प्राध्यापक स्मिता केरकार हांणी केली. कार्यशाळेचें सुत्रसंचालन विद्यार्थी सेजल नायक आनी आर्या कामत हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
