भांगरभूंय | प्रतिनिधी
नवी दिल्ली, खबरां संस्था : ट्रान्सपरन्सी इंटरनॅशनलाचो 180 देशांचो भ्रश्टाचार अहवाल मंगळारा 30 जानेवारीक जाहीर जालो. त्या अहवाला प्रमाण भारतांत 2023 वर्सा भ्रश्टाचार वाडला. अहवालाच्या करप्शन परसेप्शन इंडेक्सांत भारताचो क्रमांक 2022 वर्सा 85 वे सुवातेर आशिल्लो जो आतां 2023 वर्सा 93 वे सुवातेर पावलो. हे क्रमवारींत पयल्या क्रमांकाचेर आशिल्ल्या देशांत सगळ्यांत उणो भ्रश्टाचार आसा आनी 180 व्या क्रमांकाचेर आशिल्ल्या देशांत सगळ्यांत चड भ्रश्टाचार आसा. ह्या अहवाला प्रमाण चीन 76 वे आनी पाकिस्तान 133 वे सुवातेर आसा. मजगतीं, डेन्मार्क पयलें सुवातेर आसा. हो सगळ्यांत उणो भ्रश्टाचार आशिल्लो देश जाल्यार सोमालिया 180 वे सुवातेर आसा, जो सगळ्यांत चड भ्रश्टाचार आशिल्लो देश.
ह्या निर्देशांका खातीर ट्रान्सपरन्सी इंटरनॅशनलाचे तज्ञ दरेका देशांतल्या भौशीक क्षेत्रांतल्या भ्रश्टाचाराचें मुल्यांकन करतात. उपरांत दरेका देशाक 0 ते 100 मदले गुण दितात. ज्या देशांत जितलो भ्रश्टाचार आसा तितलेच उणे गुण दितात. आनी ह्या आदाराचेर निर्देशांकांतली क्रमवारी थारायतात. 30 जानेवारीक जाहीर केल्ल्या 2023 वर्साच्या अहवालांत भारताचे गुण 39 थारायल्यात. 2022 वर्सा ते 40 आसले. फकत एक आंकडो वगडावन भारत 85 वे सुवातीं वयल्यान 93 वे सुवातेर पावलो.
हें वळेरेंत भूतान 26 वे सुवातेर आसा. चीनाचो क्रमांक 76 वो आसा आनी हांगाय 2022 वर्साचे तुळेंत 2023 वर्सा भ्रश्टाचार वाडला. श्रीलंका हे वळेरेंत 115 वे सुवातेर आसा, म्हणल्यार भारता परस श्रीलंकेंत भ्रश्टाचार चड आसा. उपरांत नेपाळ 108 वे, पाकिस्तान 133 वे, बांगलादेश 149 वे आनी अफगाणिस्तान 162 वे सुवातेर आसा. अशे तरेन भूतान आनी चीन सोडल्यार चडशा शेजारच्या देशांनी भारता परस चड भ्रश्टाचार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
