भांगरभूंय | प्रतिनिधी
शरदाचें वचप खूब धक्को दिवपी आसा. दरेकल्याक वच्चेंच पडटा ही जिणेयात्रा सोंपोवन, हें खबर आसूनय काळीज इतलें कित्याक पिळवटून येता लागींचे इश्ट अचकीत वतकच? जिणेंतल्या भांगरा खिणांचो वांगडी आसलो शरद. आमच्या धाकटुल्या खेळां विश्वांत शरद एक म्हत्वाचो घटक आसलो. खेळां पत्रकार वांगड्यां खातीर सदांच कितें तरी करचें हो ताचो सद्दांच आग्रो आसतालो. स. विजय गाड, शरद, स. सिरिल डिकुन्हा, ज्येश्ठ पत्रकार सतिश नायक आनी हांव साबार सर्तींच्यो खबरो दिवपाच्या निमतान वराचीं वरां एकठांय आसताले. प्रत्यक्ष मैदानाचेर हाजीर रावन बातमीदारी करतना आमी जिणेंतल्यो गजालीय शॅर करताले. अगणित म्हणू येता इतल्यो सर्ती आमी कव्हर केल्यो. शरद वा स. गाड, स. सिरिल हांकां कांय कारणांक लागून मॅची, सर्तींचें वार्तांकन करपाक मैदानाचेर येवपाक जमलें ना जाल्यार अशा वेळार शरदाचो वा गाडसायबाचो फोन येतालो.
त्या वेळार गोंयांत फक्त दोनूच मराठी दिसाळीं. गोमन्तक आनी नवप्रभा. इंग्लीश दिसाळीं नवहिंद टायम्स आनी हेराल्ड. स. सिरील डिकुन्हा आनी उपरांत ज्योवितो लोपीस, फ्रान्सिस हे अनुक्रमान नवहिंद आनी हेराल्डा खातीर खेळांच्यो बातम्यो करताले. सतिश नायक आकाशवाणी खातीर बातमीदारी करताले. यूएनआय हे राष्ट्रीय खबरां संस्थे खातीर शरद काम करतालो. आमचें ल्हानशें जग. पूण नातें इतलें घट्ट बांदिल्लें की एकमेकां कडेन सांजवेळा उलयले बगर दीस वचनासल्लो. खेळां मैदानाचेर दिसभरांत कितें घडलें हाचेर चर्चा जाताली. यूएनआय आसूं वा आकाशवाणी वा हेर दिसाळीं एकमेकांक कितें चुकलें अशें सहसा केन्ना जालें ना.
गोवा क्रीडा पत्रकार संघटना.. शरद नायक, सतिश नायक, गाडसायब, सिरिल विवीध कार्यावळी करपाक सदांच मुखार. तातूंत नवहिंद टायम्साचे संपादक मुदलियार आमच्या धाकटुल्या संवसारांत आयले. खेळां पुरस्कार, बंगळूर – गोंय क्रिकेट भोंवडी…. गोंय खेळां पत्रकार संघ तेन्ना खूबच सक्रीय. स. विजय गाड, मुदलियार, सतिश नायक आनी हांवें मेळून खूब कार्यक्रम केले. तातूंत खूब कितें शिकपाक मेळ्ळें. मैदानाची प्रत्यक्ष वळख जाली. ताचे कडेन नातें, मैदानांत खेळपी खेळगड्यां कडेन नातें, फकांडां, रागार-फुगार, मोग, मोयपास, मजतीचो हात…. हें आयज सगलें सपन कशें दिसता.
कितें ना आमी पळोवंक? शरद, हांव, सतिश, लोपीस ह्या खेळां इश्टांनी गोंयांतल्या पयल्या आंतरराष्ट्रीय क्रिकेट मॅचीचें वार्तांकन केलें. पणजी जिमखान्याचेर रणजी जैतिंवत तमिळनाडू आनी न्यूझिलँड हांचे मजगतीची मॅच. नेहरू स्टेडियमाचें उक्तावण आनी पयली आंतरराष्ट्रीय फुटबाॅल सर्त…. आमी एकठांय बसून बातम्यो बरयल्यात. तें याद जाता तेन्ना ह्या वेळार शरदा वांगडा विजय गाडसायब, सिरिल डिकुन्हा, मुदलियार आनी तेन्नाचे खेळां मंत्री सर्गेस्त माँत क्रुझा हांची याद जाले बगर रावना.
गोंयचें खेळां विश्व हाची याद काडूं वा ना काडूं, म्हजे घट इश्ट शरद नायक हांच्या निमतान म्हजे गुरू स. विजय गाड, खेळां मंत्री माँत दी क्रुझ हे सगली प्रतिश्ठा कुशीक दवरून, आमच्यांत ल्हान जावन सामील जाल्ले व्हडल्या दिसाळ्याचे संपादक मुदलियार हांची याद येताच. शरद, तूं आमचे मदीं सदांच उरतलो.
हालींच तूं ज्येश्ठ पत्रकार संघटना सक्रीय जावची, हे खातीर आग्रही आसलो. तुजी इत्सा चालीक लागल्या रे शरद, पूण तूं आमचे मदीं ना. शरद तुका काळजा कडेन धरूं वा सलाम करूं. तूंच थारय.
(लेखक ज्येश्ठ खेळां पत्रकार आसात.)
सुभाष कृष्णा नायक
बिठ्ठोण
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
