भांगरभूंय | प्रतिनिधी
भांगरभूंय । प्रतिनिधी
वाळपयः प्रभू रामचंद्रा विशीं आक्षेपार्ह विधान करपी अल्फाज खान हाच्या आड केरी पुलीस चौकीर वचून सुमार 500 राम भक्तांनी आक्रमक भूमिका घेतली. ताका लागून तणावाची स्थिती उप्रासली. निमणे मुस्लिम जमातीन आनी खान हाणे माफी मागल्ल्यान तणाव निवळलो. अल्फाज खान हाका वाळपय पुलिसांनी तांब्यांत घेतलां अशी म्हायती पुलीस
सूत्रांनी दिली. प्रभू रामचंद्रा विशीं नाका जाल्लीं विधानां करून वातावरण इबाडावपाचो यत्न केल्यार ताचे खर परिणाम भोगचे पडटले अशी शिटकावणी केरींतल्या राम भक्तांनी दिल्या.
केरी हांगचो अल्फाज खान व्हो सान पिरायेचो भुरगो इस्टाग्रमाचेर वेगवेगळे पोस्ट घालता. मात मंगळाराक ताणे कहर करून रामचंद्रा विशीं आक्षेपार्ह पोस्ट घातलो आनी ताची म्हायती केरी वाठारांत पातळ्ळी. राम भक्तांनी एकठांय येवन ताका जाप विचारपाचो यत्न केलो. मात तो तांकां मेळ्ळो ना. म्हणून ते निमणे केरी पुलीस चौकीर गेले. एक वरां भितर सुमार 500 राम भक्तींनी चौकीर गर्दी केली. अल्फाज खान हाचेर कारवाय जाय मेरेन पुलीस चौकींतल्या वच्चे नात अशें पवित्रो तांणी घेतिल्लो.
थळाव्या मुस्लिम नागरिकांनी अल्फाज खान हाका केरी पुलीस चौकीर हाडून ताका माफी मागपाक लायली. वाळपयचो पुलीस निरीक्षक राहुल नायकान राम भक्तांची समजून काडली आनी कायद्यान फावो ती कारवाय करपाचें उतर दिलें. मुस्लिम जमात आयज (बुधवार) बसका घेवन हिंदू आनी मुस्लिमां मदीं इश्टागतीचे संबद उरचे. तातूंत इबाड जावचो न्हय हेखातीर उपाक सोदून काडटले. अल्फाजान केला तसलो प्रकार हाच्या फुडें जावचो ना अशें उतर तांणी पुलीस चौकीर राम भक्तांक दिलांं
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
