भांगरभूंय | प्रतिनिधी
भांगरभूंय । प्रतिनिधी
पोरणे गोंयः पोरणे गोंय पंचायत मंडळान पोरणे गोंयच्या दायज वाठारांत अस्तित्वांत नाशिल्ल्या घर नंबर दिल्ले. ग्लेन काब्राल आनी मारयाण फेर्रावं हांणी हें प्रकरण उक्ताडार हाडल्लें. पोरणे गोंय पंचायत मंडळान घर नंबर दिल्ल्यांक तें कित्याक रद्द करचे न्हय हे खातीर कारणा दाखयात नोटीशी धाडल्ल्यो. ह्या प्रकरणांत वस्तुस्थिती पळोवपा खातीर सोमाराक तपासणी दवोरल्ली. मात जमीन धनी येवंक नाशिल्ल्यान ती परत फुडें धुकलची पडली.
पळोवणी करपाक गेल्ल्यां मदी सरपंच मेधा पाटकार, पंच वांगडी सारिका नायक, पंचायत सचीव रुपेश हळर्णकार आनी पंचायत कर्मचारी हांचो आसपाव आशिल्लो. हाचे पयलीं 5 जानेवारीक ही तपासणी दवोरल्ली, तेन्नाय जमीन धनी आयले ना म्हणून ती फुडें धुकलल्ली. सोमराक पंचायतीचे पदाधिकारी आनी काब्राल आनी फेर्रांव तपासणी करपाक गेल्ले. बरोच वेळ वाट पळोवन लेगीत जमीन धनी सुवातेर आयले नात. घर नंबर प्रकरण पंचायत मंडळाच्या फुडले पद्रशींतले बसकेंत परत मांडपाचें अधिकाऱ्यांनी थारायलां.
आमी तिसवाडीच्या गटविकास अधिकाऱ्याक पुलिसांक वांगडा घेवन तपासणी करपाची विनवणी करपी पत्र बरयतले अशे पोरणो गोंयचो उपसरपंच विश्वास कुर्टीकार हांणे पत्रकारांक सांगलें. जमीन धनयांनी तांका धाडल्ल्या कारणे दाखय नोटिशींक जाप दितना तांचे जमनीत सध्या जीं घरां आसात ती सोडून बाकी कसलेंच बांदकाम ना अशें सांगला अशी म्हायती कुट्टीकारान दिली. कितली घरां आसात आनी कितले घऱ नंबर दिल्यात तें आमकां सोदून काडपाक जाय. ही म्हायती मेळ्ळ्या बगर आमी दिल्ले घर नंबर रद्द करपाक शकनात अशेंय ताणे सांगलें.
सेगीत दुसरे फावट पळोवणी करपाक जमीन धनी आयले नात हे खातीर कागाळ करपी ग्लेन काब्राल आनी मारयाण फेर्रावं हांणी नाराजी उक्तायली. दिल्ले घर नंबर रद्द पोरणे गोंय पंचायत मंडळान रद्द करचे हे खातीर आमी हेर कायदेशीर उपाय करतले अशें तांणी सांगलें.
.पळोवणी करपाक गेल्ल्यां मदी सरपंच मेधा पाटकार, पंच वांगडी सारिका नायक, पंचायत सचीव रुपेश हळर्णकार आनी पंचायत कर्मचारी हांचो आसपाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
