भांगरभूंय | प्रतिनिधी
भांगरभूंय । प्रतिनिधी
पेडणेः म्हायती आनी तंत्रगिन्यान मंत्री रोहन खंवटे हांणी तुयेंच्या इलेक्ट्रॉनिक्स सिटी प्रकल्पाक भेट दिवंन थंयची म्हायती घेतली. फुडल्या पांच स म्हयन्यां भितर चार-पांच व्हडल्यो कंपन्यो ह्या सिटींत येतल्यो. ते खातीरची प्रक्रिया पुराय करतले. ड्रोन ही व्हड कंपनी आपलो वेवसाय सिटींत सुरू करपाक इत्सूक आसा अशें ताणे थळाव्या पत्रकारांक सांगलें. लक्ष्मीकांत पार्सेकार मुख्यमंत्री आसतना पंतप्रधान नरेंद्र मोदी हांचे हस्तुकी ह्या इलेक्ट्रॉनिक्स सिटीचो बुन्यादी फातोर बसयल्लो. मात आजय मेरेन थंय एकूय प्रकल्प आयिल्लो ना.
इलेक्ट्रॉनिक्स सिटींत जे प्रकल्प येतले तांतून थळाव्या लोकांक नोकऱ्यां खातीर प्राधान्य दितले. वट्ट सतराशें तरणाट्यांक रोजगार मेळटलो असो अदमास आसा. कर्मचाऱ्यांक रोजगार पूर्व प्रशिक्षण दिवपा खातीर प्रशिक्षण केंद्र उबारतले अशें ताणे सांगलें. इलेक्ट्रॉनिक्स सिटींत प्रशासकीय इमारतीचें 80 टक्के काम पुराय जालां. तातूंत पुलीस चौकी आसतली अशी म्हायती खवेंट हाणे दिली. पार्सेकार सरकारान सिटी खातीर 6 लाखां परच चड चौखण मीटर जमीन संपादीत केल्ली. जांच्यो जमनी घेतल्यात तांका अजून लुकसाण भरपाय मेळ्ळी ना. तुमी ती मेळोवन दितले काय किदें, अशें विचारलें तेन्ना सरकारान कशे तरेन जमनी संपादीत केल्यात ताची म्हायती घेतलो. लुकसाण भरपाय दिवपाच्या प्रस्नाचेर मुख्यमंत्री प्रमोद सावंत हांचे कडेन चर्चा करची पडटली अशें ताणे सांगलें.
इलेक्ट्रॉनिक्स सिटींत प्रकल्प हाडपा खातीर दिल्लींत वेगवेगळ्या कंपन्यां कडेन आपणे चर्चा केल्या. वेगवेगळ्यो कंपन्यो ह्या सिटींत येवच्यो हे खातीर आपले यत्न चल्ल्यात. सध्या सिटी कडेन येवपी लिंग रोड राष्ट्रीय म्हामार्ग 66 जोडपाचें काम अजून पुराय जाल्लें ना. ताका लागून कंपन्यो सिटींत प्रकल्प सुरू करपाक अनमनतात. ताका मशिनरी हाडपाक आडमेळे येतात. ते खातीर जमीन जाय ती ताब्यांत घेवपाची प्रकिया पुराय जाल्या अशी म्हायती ताणे दिली.
थळाव्या लोकांक रोजगाराची संद मेळपा खातीर इलेक्ट्रॉनिक्स सिटी सुरू जावपाची गरज आसा. ते खातीर आपले यत्न सुरू आसात. फुडल्या दोन वर्सांत सिटींत उद्देगीक प्रकल्प सुरु जातले अशें मांद्रेचो आमदार जीत आरोलकारान सांगलें. सिटींत कसले उद्देगधंदे येतले हाची म्हायती तुयें पंचायतीक दिवपाक जाय. अशें सरपंच सुलक्षा नायकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
