भांगरभूंय | प्रतिनिधी
मडगांव, प्रतिनिधी ः मडगांवच्या गांधी मार्केटांत 3 वर्सां पिरायेची चली आनी 2 वर्सांचो चलो मेळ्ळे उपरांत कोंकण रेल्वे पुलिसांनी तांकां कोणे सोडलीं तें सोदून काडपा खातीर सोद सुरू केल्लो. उत्तर प्रदेशांतल्या मन्नू पांडे हांकां दोन बायलो आसात आनी कुटुंबीक वादांत दुस्वास जाल्ल्यान हो प्रकार घडिल्लो अशें कळ्ळां. सावत्र आवय दोनूय भुरग्यांक गोंयांत सोडून गेली, पूण सख्खे आवयन तांकां सोदून काडलीं.
तीन दीस आदीं मडगांवच्या गांधी मार्केटांत तीन वर्सां पिरायेची चली रडटाना सांपडिल्ली. त्याच दिसा रेल्वे पुलिसांक रेल्वे स्टेशनाचेर दोन वर्सांचो भुरगो मेळ्ळो. दोनूय भुरग्यांक पुलिसांनी वैजकी तपासणी उपरांत बाल कल्याण समिती कडेन दिले. सीसीटीव्ही कॅमेऱ्याचे फुटेज तपासले तेन्ना एका जोडप्यान नेत्रावती एक्सप्रेसांतल्यान भुरग्यांक हाडून एकल्याक रेल्वे स्टेशनाचेर आनी दुसऱ्याक गांधी मार्केटांत सोडल्याचे कळ्ळें. हाची चवकशी करपा खातीर मडगांव पुलिसांनी एक पंगड कर्नाटकांत धाडलो.
कोंकण रेल्वे पुलीस निरिक्षक सुनील गुडलर हांचे वांगडा एएसआय म्हामल, एएसआय मनोज मांद्रेकार, एलपीसी अश्विता नायक, पीसी प्रदीप गांवकार हांणी वरिश्ठांच्या मार्गदर्शना खाला तपास सुरु दवरलो.
भुरग्यांची आवय अंजली पांडे (32, मध्य प्रदेश) हिणें कोंकण रेल्वे पुलिसां कडेन संपर्क सादल्या उपरांत ही घडणूक उजवाडाक आयली. अंजली पांडे हिचो घोव मन्नू पांडे हाची दोन लग्नां जाल्यात. मन्नू महाराष्ट्रांतल्या साकर कारखान्यांत काम करता. ताची पयली बायल निकी पांडे. तिका दोन भुरगीं आसात. जाल्यार अंजली पांडेक दोन भुरगीं आसात. चलयेचें नांव सुखी पांडे (3) आनी देड वर्सां पिरायेच्या भुरग्याचें नांव आयुष पांडे. कुटुंबीक वादाक लागून हो प्रकार घडलां.
मन्नू पांडेची घरकान्न निकी पांडे राजगुरू नांवाच्या मनशा वांगडा रेल्वेंतल्यान गोंयांत येतना अंजली पांडेचीं सुखी आनी आयुश हीं दोनूय भुरगीं घेवन आयली आनी तांकां हांगां सोडलीं. भुरगीं घरांत नात हें कळटकच अंजली पांडे तांकां सोदपाक लागली. अंजली आनी मन्नून कोंकण रेल्वे पुलिसां कडेन संपर्क सादलो आनी त्या वेळार कोंकण रेल्वे पुलिसांनी सीसीटीव्ही वरवीं सोद सुरु आशिल्लो. ‘बायलांचो एकवोट’ चो अध्यक्ष आवडा व्हिएगस हांचे सयत कोंकण रेल्वे पुलिसांनी उल्लेख केल्ल्या बायलेची वळख पटयली. भुरग्यांनीय आवयची वळख करून घेतल्या आनी फुडली चवकशी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
