भांगरभूंय | प्रतिनिधी
इंग्लंडा आड 2 फेब्रुवारी सावन सुरू जावपी दुसरे टॅस्टी पयलीं भारताक दोन धपके बसल्यात. अश्टतासांचो खेळगडो रवींद्र जडेजा आनी बॅट्समन लोकेश राहुल हांकां दुखापतीक लागून पंगडांतल्यान भायर बसचें पडटलें.
निवड समितीन सौरभ कुमार, सरफराज खान आनी वॉशिंग्टन सुंदर हांचो पंगडांत आस्पाव करपाचो निर्णय घेतला. पांच मॅचींचे माळेंतले पयले मॅचींत भारताक 28 धांवड्यांनी हार घेवची पडिल्ली. हेच मॅचींत खेळटना जडेजा आनी राहुल जखमी जाल्लो.
हैदराबादांत जाल्ले पयले टॅस्टींत जडेजाचे स्नायू दुखाविल्ले. पांयाचें स्कॅनींग केलां आनी ताचो रिपोर्ट अजून येवपाचो आसा. राहुलाच्या जांगेंत दुखपाक लागलां. ताका लागून ताका लेगीत दुसरे टॅस्टी खातीर विसव दिला.
पयले टॅस्टीच्या चवथ्या दिसा इंग्लंडाचो मुखेली बेन स्टोक्साच्या थेट थ्रोचेर जडेजा धांवबाद जाल्लो. तंबूंत परतून वतना ताका सारकें चलपाक जमनाशिल्लें. मॅच सोंपल्या उपरांत जडेजान हैदराबादांत आपल्या पांयाचें स्कॅन करून घेतलें.
जडेजाच्या स्कॅनाचो रिपोर्ट मुंबय इन्स्टिट्यूटांत धाडला. सगल्या खेळगड्यांच्या स्कॅनाचो रिपोर्ट थंयच धाडटात. रिपोर्ट आयल्या उपरांत जडेजाक एक टॅस्ट चुकतली काय माळूच चुकतली हें स्पश्ट जातलें.
जडेजाचे सुवातेर घेतिल्लो सौरभ कुमार लेगीत दावखुरो स्पिनर आसा. तशेंच उपेगी बॅट्समन लेगीत आसा. देशांतर्गत क्रिकेट सर्तींत उत्तर प्रदेशा वतीन खेळपी सौरभान पयले श्रेणीचे क्रिकेटींत अजून मेरेन 68 मॅची खेळ्ळ्यात. 290 विकेटी घेवपा खेरीत 2061 धांवड्यो लेगीत केल्यात. ताणें हालींच जाल्ले इंग्लंड अ पंगडा आडचे मॅचींत 77 धांवड्यो केल्ल्यो, तशेंच 6 विकेटी लेगीत घेतिल्ल्यो.
मुंबय वतीन खेळपी सरफराज खान अजून मेरेन 45 पयले श्रेणीच्यो मॅची खेळ्ळा. मदले फळयेंत खेळपी सरफराजान पयले श्रेणींत सुमार 70चे सरासरीन 3912 धांवड्यो केल्यात. हातूंत 14 शेंकड्यांचो आनी 11 अर्द शेंकड्यांचो आस्पाव आसा.
वॉशिंग्टन सुंदर हाचे पयलीं भारता वतीन खेळ्ळा. ऑफ स्पिनर अश्टतासांच्या सुंदरान अजून मेरेन चार टॅस्टींनी खेळटना स विकेटी घेतल्यात आनी 265 धांवड्यो केल्यात.
चायनामॅन बॉलर कुलदीप यादव दुसरे टॅस्टींत जडेजाची सुवात घेवपाक शकता. कुलदीप 15 वांगड्यांच्या पंगडांत चवथो स्पिनर आसा. पयले टॅस्टी खातीर ताका निमाण्या इकरांत सुवात दिवंक नाशिल्ली. पयले टॅस्टींत जडेजा वांगडा अक्षर पटेल आनी आर आश्विन हांकां खेळपाची संद मेळिल्ली.
भारत आयज दुसरे टॅस्टी खातीर विशाखापट्टनमाक वचपाक भायर सरतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
