भांगरभूंय | प्रतिनिधी
सत्र न्यायालयांतलो दोशी खंडपिठान थारायलो निर्दोश
पणजी : सवत्या बापाय कडल्यान चलयेचेर लिंगीक अत्याचार प्रकरणांत सत्र न्यायालयान दोशी थारायिल्ल्या आरोपीची खंडपिठांत निर्दोश सुटका जाली. दुबावाक लागून आरोपीची निर्दोश सुटका जाल्या अशें खंडपिठान निवाड्यांत म्हणलां. आरोपीचो गुन्यांव सिद्द करपा इतले सबळ पुरावे प्रतिवाद्यांनी (पुलीस) सादर करूंक ना, अशें खंडपिठाचें निरिक्षण आसा.
मुंबय उच्च न्यायालयाच्या गोंय खंडपिठाचे न्यायाधीश बी. पी. देशपांडे हांणी हो निवाडो दिला. चिंबलाच्या समीर सरकार हाचे आड 2019 वर्सा पोरणें गोंय पुलीस स्टेशनार गुन्यांव नोंद जाल्लो. चलयेचेर लिंगीक अत्याचार करपा सयत जिवे मारपाची धमकी दिवपाच्या कागाळी उपरांत गुन्याव नोंद जाल्लो. पुलिसांनी तपास करून आरोपी आड आरोपपत्र दाखल केलें. अतिरिक्त सत्र न्यायालयान कलम 376 (लिंगीक अत्याचार) आनी 506 (2) खाला आरोपीक दोशी थारावन 10 वर्साची बंदखणीची ख्यास्त दिली. ख्यास्ती सयत 20 हजाराचो दंड घालो.
ह्या निवाड्याक आरोपीन खंडपिठांत आव्हान दिलें. सबळ पुरावे नाशिल्ल्या कारणान खंडपिठांत दुबावाचो लाव आरोपीक मेळ्ळो. आरोपी समीर सरकार हाची आव्हान याचिका मान्य करतना अतिरिक्त सत्र न्यायालयाचो निवाडो खंडपिठान रद्द थारायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
