भांगरभूंय | प्रतिनिधी
म्हापशें: बार्देस म्हालांतल्या पंचायत पोटवेंचणुकेंत शिरसय प्रभाग पांचांतल्यान तेजा राजेश कांदोळकार जैतिवंत जाल्यो. जाल्यार हडफडें-नागवा पंचायतीच्या प्रभाग पांचांतल्यान ज्युलियस आगुस्तीन डिसोझा हे बिनविरोध वेंचून आयले. सोमारा 29 वेर ह्या दोनूय पोटवेंचणुकांचे निकाल बार्देस मामलेदारान वेंचणूक अधिकारी ह्या नात्यान जाहीर केले.
शिरसय पंचायत प्रभाग पांचांतले पोटवेंचणूक मतदान आयतारा 28 वेर जाल्लें. तेजा कांदोळकाराक 123 मतां मेळ्ळीं. हो प्रभाग ओबीसी बायलां खातीर राखीव आशिल्लो. ह्या प्रभागांत तिरंगी लडत जाली. कांदोळकार हांच्या विरोधांत ग्रिश्मा निखील कांबळी आनी रुपम सतीश कुडणेंकार वेंचणूक रिंगणांत देंविल्ल्यो.
ग्रिश्मा हांकां 63 मतां पडलीं, जाल्यार रुपम हांकां 77 मतां पडलीं. आदले पंच वांगडी मेशा कुडणेंकार हांकां सरकारी नोकरी मेळिल्ल्यान तिणें आपलो पंच वांगडीपदाचो राजिनामो दिल्लो. ह्या रित्या सुवाते खातीर ही पोटवेंचणूक जाली.
तशेंच हडफडें नागवा पंचायत प्रभाग पांच चे पंच वांगडी आगुस्तीन (टिनू) डिसोझा हांकां फाटल्या सप्टेंबर म्हयन्यांत मरण आयिल्लें. ताका लागून ही सुवात रिती जाल्ली. हे सुवातेर जाल्ले पोटवेंचणुकेंत टिनू डिसोझा हांचो पूत ज्युलियस डिसोझा हांचो एकूच उमेदवारी अर्ज निर्वाचन अधिकाऱ्या कडेन आयिल्लो. ताका लागून ते पयलींच बिनविरोध वेंचून आयिल्ले आनी सोमारा तांच्या नांवाची वेंचणूक अधिकाऱ्यांनी औपचारीक घोशणा केली.
ह्या वेळार वेंचणुकेंत जैतिवंत जाले उपरांत तेजा कांदोळकारान म्हणलें, म्हाका वेंचून हाडपा खातीर यत्न केल्ल्या सगल्या मतदारांचें, म्हजे कुटूंब आनी इश्टांचे हांव उपकारी आसां. हाचे मुखार प्रभागा खातीर काम करतना हांव मुखेलपणान बायलां सक्षमीकरणाचेर भर दितलें. पंचायती वतीन ज्यो येवजण्यो राबयतात त्यो चडश्यो लोकां मेरेन पावनात त्यो येवजण्यो निमाण्या मनशां मेरेन पावोवपाचो यत्न करून समाजीक कार्यांतूय हांव सक्रीय आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
