भांगरभूंय | प्रतिनिधी
भाजपाचें ‘गांव चलो’, जाल्यार काँग्रेसीन मागयले अर्ज
पणजी: सत्ताधारी भाजपा सयत विरोधी पक्ष आशिल्ल्या काँग्रेसीनूय लोकसभा वेंचणुकेचे तयारेक गती दिल्या. वेंचणुकेचे फाटभुंयेर भाजपान ‘गांव चलो’ अभियानाचो नारो दिला, जाल्यार काँग्रेसीन दोनूय मतदारसंघांतल्या इत्सूक उमेदवारां कडल्यान अर्ज मागयल्यात.
लोकसभा वेंचणुके खातीर गोंयचे वेंचणूक प्रभारी म्हूण नेमणूक जाल्ले भाजपाचे आशीश सूद सोमारा गोंयांत पावले आनी भाजपाची कोअर समिती तशेंच हेर मुखेल पदाधिकाऱ्यां कडेन बसका घेतली. हे बसकेंत लोकसभा वेंचणुकेचे फाटभुंयेर चर्चा जाली. वेंचणुकेचे फाटभुंयेर पक्षान ‘गांव चलो’ अभियान राबोवपाचो निर्णय घेतला अशी म्हायती मुख्यमंत्री डॉ. प्रमोद सावंत हांणी पत्रकारां कडेन उलयतना दिली.
भाजपाचे सगले आमदार, फुडारी, पदाधिकारी आनी कार्यकर्ते गांव चलो अभियानांत वांटेकार जातले अशें सांगून ह्या वेळार लोकसभेच्यो दोनूय सुवाता भाजपाच जिखतली असो ठाम विस्वास परतून एकदां मुख्यमंत्र्यांनी उक्तायलो.
लोकसभा वेंचणूक फक्त तीन ते चार म्हयन्यांचेर येवन रावल्या. ताका लागून भाजपान वेंचणुकेचे तयारेक गती दिवपाक सुरवात केल्या आनी ते फाटभुंयेर केंद्रांतले ज्येश्ठ फुडाऱ्यांनीय गोंयची वाट धरपाक सुरवात केल्या. फाटले फावटी दक्षीण गोंयची सुवात भाजपाच्या हातांतल्यान गेल्ली. हे फावटी मात उत्तरे सयत दक्षीण गोंयांतूय जैत मेळोवपाचो यत्न भाजपाच्या केंद्र आनी राज्यांतल्या फुडाऱ्यांनी सुरू केला. ते खातीर ‘गांव चलो’ अभियानाचो पर्याय आपणायला.
ह्या अभियानांतल्यान गांवांगांवां मेरेन पावून केंद्र आनी राज्य सरकाराच्या येवजण्यांची परतून एकदां जागृती करपाचेर भर दितले. तशेंच प्रधानमंत्री नरेंद्र मोदी हांच्या फुडारपणा खाला केंद्र सरकारान फाटल्या धा वर्सांत गोंयचो सादिल्लो विकास लोकां मेरेन पावयतले अशी म्हायती भाजपाच्या गोपांनी दिली.
भाजपा बाराय म्हयने काम करपी पक्ष: सूद
भाजपान लोकसभा वेंचणुकेची तयारी सुरू केल्ली आसली तरी भाजपा हो बाराय म्हयने काम करपी पक्ष आसा. लोकसभा वेंचणुकेचे फाटभुंयेर सोमारा आपणे प्रदेश भाजपाच्या मुखेल पदाधिकाऱ्यां कडेन बसका घेतली. केंद्र सरकाराच्या येवजण्यांची राज्यांत कशे तरेन अंमलबजावणी जायत आसा हाचो नियाळ फुडल्या कांय म्हयन्यांत घेतले अशें आशीश सूद हांणी पत्रकारां कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
