भांगरभूंय | प्रतिनिधी
पुणें, झांशी सयत गोंयांतल्यान दुबावितांक अटक
मडगांव: चिंचोणें बाजारपेठेंतलें भांगराचें दुकान रातच्या वेळार फोडून 10 लाखांचो म्हालवज फारायिल्लो. ह्या प्रकरणांत कुंकळ्ळी पुलिसांनी मेळिल्ल्या पुराव्यांच्या आदाराचेर गोंयांतल्यान दोगांक जाल्यार पुणें आनी झांशी (उत्तर प्रदेश) सावन दोगांक अशा चार जाणांक अटक केल्या. हे चारूय दुबावीत चोर उत्तर प्रदेशांतले आसात.
मेळिल्ले म्हायती प्रमाण चिंचोणें वाठारांतले झहीर गोल्ड अॅण्ड ज्वेलर्स हें दुकान 23 जानेवारी दिसा सांजवेळा सात ते फांतोडेर तीन वरांच्या सुमाराक अनवळख्या चाेरांनी फोडलें. भांगराच्या दुकानाच्या जनेलाचें ग्रील्स कापून हारसो फोडून चोरांनी दुकानांत प्रवेश केलो. दुकानांतले 10 कील रुप्या सयत 100 ग्राम भांगर चारलें. दुकानांतल्या सीसीटीव्ही कॅमेऱ्यांत हें सगलें बंदिस्त जालें.
पुलिसांक सीसीटीव्ही फुटेज मेळ्ळे उपरांत ते नदरेन फुडलो तपास सुरू केलो. सीसीटीव्ही फुटेजी प्रमाण चार चोरांनी दुकानाचे ग्रिल्स कापून दुकानांतल्या भांगराची चोरी केली. हातूंत चार चोरांनी दुकानांत प्रवेश केलो. सगल्या चोरांनी आपलो चेरो कपड्यान धांपिल्लो. कुंकळ्ळी पुलिसांनी घरफोडी करप, चोरी करप अशा गुन्यांवा खाला हें प्रकरण नोंद करून घेतिल्लें.
कुंकळ्ळी पुलीस निरिक्षक डायगो ग्रासियस हांच्या मार्गदर्शना खाला कविता रावत हांणी ह्या प्रकरणांत तपास केलो. मेळिल्ल्या पुराव्यांच्या आदाराचेर पुलिसांनी तपासाक सुरवात केली. ह्या प्रकरणांत दुबावीत अमरकुमार कनोजिया (32, रा. कोमियाखुरीस, कुंकळ्ळी, मूळ गोंडा जिल्हो उत्तर प्रदेश), बदकाऊ चौहान (34, रा. डोंगरी, नावेली, मूळ उत्तर प्रदेश), सुरेंद्र कुमार (30, रा. पुणें, मूळ उत्तर प्रदेश हांचे सयत झांशी उत्तर प्रदेश सावन बोंडू चौहान (रा. उत्तर प्रदेश) हांकां अटक केली. हे सगले उत्तर प्रदेशांतले रहिवासी आसून कामगार म्हूण कार्यरत आसात. तांकां कुंकळ्ळी पुलिसांनी अटक केल्या. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
