विविध मागण्यां खातीर अभाविपचें आंदोलन

भांगरभूंय | प्रतिनिधी

पणजीः सोमारा अखील भारतीय विद्यार्थी परिशदे वतीन (अभाविप) पणजेच्या सरकारी तंत्रनिकेतना भायर आंदोलन केलें.

ह्या वेळार विद्यार्थ्यां खातीर चड बशी दिवप, जेवणाचो वेळ बदलप, वाठारांत नितळसाण राखप, जिमखानो दिवप, अश्यो विवीध मागण्यो केल्यो. ह्या वेळार शंबरा परस अदीक विद्यार्थी हाजीर आशिल्ले.

हे संबंदांत आंदोलन करपी विद्यार्थ्यांनी सांगलें, सध्या विद्यार्थ्यां खातीर एकूच बस आसा. तातूंत लेगीत 30 सिटांची तांक आसतना 40 ते 45 भुरग्यांक बसयतात. ताका लागून विद्यार्थ्यांचे सुरक्षेचो प्रस्न उप्रासता. एकूच बस आशिल्ल्यान खूबश्या विद्यार्थ्यांक सकाळचो वर्ग चुकता. हे खातीर आमी चड बशी दिवपाची मागणी केल्या. तशेंच म्हाविद्यालयाचो वेळ सकाळीं 9 ते सांजेचीं 5 वरां मेरेन करप, 11 वरांच्या सुमाराक च्याये खातीर वेळ दिवचो, जेवणाचो वेळ दनपारां 12.15 बदला 1 वराच्या सुमाराक क रचो, वेंचणूक आयोगा कडेन दिल्लो जिमखामो परतून ताब्यांत घेवन विद्यार्थ्यांक दिवचो, नवे बांक दिवचे, शौचालयाची नितळसाण राखची, इमारतीची वेळावेळार देखभाल करप, अश्यो मागण्यो केल्यात.