भांगरभूंय | प्रतिनिधी
भांगरभूंय । प्रतिनिधी
वास्कोः मुरगांव ज्येश्ठ नाट्य साहित्यीक कलाकार संघटनेन आयोजीत केल्ल्या मंदा नारायण बांदेकार यादस्तीक 9वे गोंय पांवड्या वयले बायलांच्या भजनी सर्तींत पंचमी- खांडेपार हांगच्या श्री शांतादुर्गा साखळ्यो बायल भजनी मंडळान पयलें इनाम मेळयलें. वास्कोच्या श्री शिवसमर्थ सांस्कृतीक भजनी मंडळाक दुसरे जाल्यार सडा- वास्कोच्या तिरुपती बालाजी भजनी मंडळाक तिसरें इनाम फावो जालें.. ओंकार भजनी मंडळ (कोलवाळ), लईराई केळबाय भजनी मंडळ ( बाभवाडा मुळगाव), गजानन भोगदेश्वर भजनी मंडळ ( बोगदा वास्को) हांकां उमेद वाडोवपी इनामां दिली.
हेर जैतिवंतः उत्कृष्ट गायिका – शारदा शेटकार (तिरूपती बालाजी मंडळ), उत्कृष्ट पखवाजवादक- स्नेहा नार्वेकार ( श्री ब्राम्हणेश्वर भजनी मंडळ बेलाबाय -वास्को ), उत्कृष्ट गवळण- दिशा कुर्टीकार (श्री शांतादुर्गा सांखळ्यो मंडळ, खांडेपार), उत्कृष्ट संवादिका – शलाखा चव्हाण ( श्री हनुमान भजनी मंडळ, नोनमान वास्को). सर्तींत धा बायल भजनी पंगडांक आमंत्रीत केल्लें. समीर परब आनी पवन वळवयकारान सर्तीचें परिक्षण केलें.
बायणा हांगच्या रवींद्र भवनाच्या मनोहर पर्रीकार सभाघरांत आयोजीत केल्ल्या ह्या सर्तीचें उक्तावण नाट्य कलाकार संघटनेचो अध्यक्ष वामन चोडणकार हांचे हस्तुकीं जालें. मुखेल सोयरी म्हणून सेंट जोसेफ्स् प्राथमीक विद्यालयाची सहाय्यक मुख्याध्यापिका आशा अनुप केणी आनी खासा आमंतीरित म्हणून कुंकळ्ळीची समाज वावुरपी अंजली नारायण देसाय हाजीर आशिल्ली. उद्देजक नारायण (नाना) बांदेकारान कार्यावळीची येजमानकी चलयली. माचयेर प्रभाकर मळीक, श्याम च्यारी आशिल्ले.
अंजली देसाय हिणे भजनाचे वेगवेगळे प्रकार सांगले. भजनाची सुरवात केन्ना जाली आनी उपरांत भजनांत कशे बदल जायत गेले हाची म्हायती दिली. सुदन फडतेन सूत्रसंचालन केलें आनी श्याम च्यारीन उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
