भांगरभूंय | प्रतिनिधी
भांगरभूंय । खबरां मेज
पणजीः तिबेटच्या निर्वासीत संसदेचो ज्येश्ठ वांगडी अंदुक त्सेटन हांच्या फुडारपणा सयकल्ल्या शिश्टमंडळान सोमराक विरोधी पक्ष फुडारी युरी आलेमांव हाची पर्वरी विधानसभा संकुलांत भेट घेवन तिबेटी लोकांत तेंको दिवपाची विनवणी करपी निवेदन ताका सादर केलें. तिबेटांतली सद्याची स्थिती, गोंयांत राबितो करून आशिल्ले तिबेटी आनी हेर विशयाचेर शिश्टमंडळा कडेन चर्चा केली आनी काँग्रेस पक्षाच्या तेक्याचें तांकां आस्वासन दिले. पूज्य दलाई लामा आनी तिबेटच्या लोकां विशीं ताणे आदर उक्तायलो.
तिबेटच्या निर्वासीत संसदेचो सभापती खेनपो सोनम टेनफेल हांची सयी आशिल्ल्या निवेदनांत तिबेटाक स्वतंत्र आनी सार्वभोम राष्ट्र म्हणून मान्यताय दिवपाचें आवाहन केलां. चीनाच्य अपप्रचाराचें समर्थन करचें न्हय. तिबेटांतल्या मानवी हक्क उल्लंघनाचेर गोंयच्या आमदारांनी हुस्को उक्तावचो अशें आवाहन निवेदनांत केलां. शिश्टमंडळान तिबेटी लोकांक तेंको दिल्ले खातीर काँग्रेस पक्षाचे उपकार मानल्यात. अंदुक त्सेटन हांणी युरी आलेमांव हाचो शाल आनी यादस्तीक भेटदिवंन भोवमान केलो. सोनम वांगुओन आलेमांक हागा बुद्धाची मूर्ती भेट म्हणून दिली.
शिष्टमंडळात तिबेटचे निर्वासीत संसद वांगडी त्सेरिंग यांगचेन, मुख्य प्रतिनिधी जिग्मे त्सलट्रिम, धोंडीप ताशी डेलेक, तेन्झिन जिनपा, जिंगमे भोटिया, निमा चेरिंग आणि संदेश मेश्राम, तिबेट कोअर ग्रुपाचे प्रादेशिक संयोजक हांचो आसपाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
