भांगरभूंय | प्रतिनिधी
भांगरभूंय । प्रतिनिधी
पोरणे गोंयः सर्गेस्त वसंत विठू गांवक चॅरिटेबल ट्रस्टा वतीन पोरणें गोंय पुलीस स्टेशनाचे हद्दींत सीसीटीव्ही कॅमेरे बसोवपाच्या कामाक सुरवात जाली. पयलो सीसीटीव्ही पोरण्या गोंयांतल्या गांधी चौका कडेन बसयला. ताचें उक्तावण पुलीस म्हासंचालक ओमवीर सिंग हांचे हस्तुकीं नाल्ल फोडून केलें. ह्या वेळार उत्तर गोंय पुलीस अधिक्षक निधीन वाल्सन, पोरण्या गोंयचो निरीक्षक योगेश सावंत, ट्रस्टाची अध्यक्ष नेहा गांवस, समाज सेवक अॅड शैलेश गांवस आनी हेर मानेस्त हाजीर आशिल्ले.
सीसीटीव्ही कॅमेरे पुलिसांचे दोळे आनी कान थारतले अशें सांगून ओमवीर सिंगान पुलिसांक मजत करपाच्या वसंत विठू गांवक चॅरिटेबल ट्रस्टाच्या कामाची तोखणाय केली. पोरणे गोंय पुलीस स्टेशनाचे हद्दींत मुखेल सुवातांनी मेळून 30 सीसीटीव्ही बसयतले अशी म्हायती नेहा गांवसान दिली. फुडल्या कांय म्हयन्यां भितर उत्तर गोंयांतल्या सगल्या पुलीस स्टेशनाच्या हद्दींत सीसीटीव्ही बसोवपाचो ट्रस्टाचो विचार आसा. दिवचल पुलीस स्टेशनाचे हद्दींत बसयल्ले सीसीटीव्ही कॅमेरे बरे तरेन काम करतात अशें ताणे सांगलें. सीसीटीव्हीचें नियंत्रण त्या त्या पुलीस स्टेशनांत आसतलें मात ताची देखभाल ट्रस्ट करतोलो अशेंय ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
