भांगरभूंय | प्रतिनिधी
भांगरभूंय । प्रतिनिधी
काणकोणः संजय बांदेकार मंत्री आसतना काणकोणकारांक कितें तरी मेळल्लें. ताच्या उपरांत काणकोणकारांक आपल्या हक्का खातीर रस्त्यार येवंन सगलें मेळोवचें पडलें. काणकोणच्या इतिहासांत फाटल्या कांय वर्सां सावन तेच ते आमदार आरतून परतून काणकोणकारांक मेळ्ळे. फुडले विधासभा वेंचणुकेंत बदल दिसपाक जाय अशें गोवा फॉरवर्डाचो फुडारी मोहनदास लोलयेकारान सांगलें.
आयतारा लोलयें हांगच्या नेचर हार्मोनी सभाघरांत काणकोणकरांच्या समस्या आयकून घेवपा खातीर गोवा फॉरवर्ड आनी काँग्रेस पक्षान काणकोणच्या नागरिकांची बसका घेतल्ली तेन्ना लोलयेकार उलयतालो. गोवा फॉरवर्डाचो सर्वेसर्वा आमदार विजय सरदेसाय. प्रशांत नायक, काँग्रेसचो फुडारी जनार्दन भंडारी आनी विकास भगत ह्या वेळार माचयेर आशिल्ले.
कांय जाण गोंयांत रामराज्य आशिल्ल्याचें सांगतात. तशें आसल्यार लोकांच्यो समस्या सुटाव्यो कित्याक जायनात असो प्रश्न विजय सरदेसाय हाणे बसकेंत मार्गदर्शन करतना विचारलो. उत्तर गोंय सद्या गोंयकारांच्या हातांतल्यान गेला. सगले धंदे-वेवसाय बिगर गोंयकारां कडेन गेल्यात. ताचेर आतांच उपाय काडपाक जाय. काणकोणची उदरगत जावपाक जाय जाल्यार नागरीक आराखडो तयार करपाक जाय.काणकोणच्या पर्यटन वेवसायिकां कडल्यान सरकाराक 800 कोटीं रुपयांचो महसूल मेळटा, तातूंतल्या काणकोणची उदरगत करपा खातीर सरकारान आपलो आराखडो तयार करपाक जाय अशे सरदेसाय हाणे सांगलें.
अंदूचें नवें वर्स मनोवप व्हो फ्लॉप शो थारलो. वेगवेगळ्या देशांनी तांच्या देशांत येवपा खातीर मुफत व्हिसा येवजण जाहीर केल्ल्यान गोंयांत विदेशी पर्यटक आयले नात. ताचेर गोंय सरकारान कसलीच उपाय येवजण केली ना. ताका लागून कोट्यांनी रुपयांचो महसूल बुडलो. सध्या गोंयांत इव्हेंट करपा बगर दुसरे कांयच जायना. इव्हेंट केल्यार पयशे खावपाक मेळटात असो आरोप सरदेसाय हाणे बसकेंत केलो.
निवृत्त जाल्ल्या शिक्षकांची पदां एक वर्स जालें तरी भरनात. म्हज्या विद्यालयांतली पदां भरपाक सरकारान अजून मंजुरी दिली ना. ते खातीर हांवें शिक्षण संचालकाक आठ दिसाची मुजत दिल्या अशें प्रशांत नायकान सांगलें. काणकोणातले लाकूड चोरी प्रकरण लावनं धरिल्लें. मात आपल्याच पक्षांतल्या एका प्रमुखान लाकूड चोरी प्रकरणातल्या व्यक्तीक फोन करून आपलो जनार्दन भंडारीक तेंको ना अशें सांगलें अशी म्हायती जनार्दन भंडारी हाणे ह्या वेळार दिली. गणेश मूर्तीकार सिदार्थ च्यारी हाणे गणेश मूर्तीकारांच्यो आनी सम्राट भगत हाणे वीज आनी उदका पुरवणेच्यो, सास्पार कुतिन्होन काणकोण सामाजीक भलायकी केंद्राच्यो समस्या मांडल्यो. संतोष सतरकार, जयेश नायक, उल्हास गांवकार, अजय पागी आनी कविंद्र फळदेसाय हांणी खेळ मैदान, संस्कृती भवन, पर्यटन आनी शिक्षणा संबंदीच्यो समस्या सांगल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
