भांगरभूंय | प्रतिनिधी
मडगांव, प्रतिनिधी: केळशीच्या रस्त्यांचें हॉटमिक्सींग काम ठेकेदार श्री. नायर करतले. बाणावले पंच डेव्हीड हांच्या प्रभागांत २०२२ त रस्त्याचें काम नायर हांणी केल्लें. तेन्ना आनी आतांय ठेकेदारा कडेन विचारल्यार तांचे कडेन केन्नाच कामांचें कमिशन मागूंक ना, हें ते स्पश्ट करतले, अशें सांगून आमदार व्हेन्झी व्हिएगस हांणी बाणावले ‘कमिशनराज चलना’ अशें सांगलें.
केळशीच्या रस्त्यांच्या हॉटमिक्सिंगची कामां सुरू केलीं. ह्या वेळार आमदार व्हिएगस हांचे सयत उपसरपंच रिंकू लोबो आनी प्रभागांतले नागरीक हाजीर आशिल्ले. कामाच्या उक्तावणा उपरांत आमदार व्हिएगस हांणी, प्रधानमंत्री मोदी हांच्या दौर्याचे फाटभूंयेर केळशी रस्त्यांचीं कामां करपाचे आशिल्ले. मात कांय कारणांक लागून प्रधानमंत्री ह्या रस्त्या वयल्यान येवचे नात अशें सांगलें. ताका लागून परत एक फावट केळशी हांगच्या रस्त्याचीं कामां आडकून उरपाचीं आशिल्लीं. ओएनजीसी गरज आसा त्या वाठारांनीच रस्त्यांचीं कामां करतले. केळशेचीं कामां फुडें धुकल्ल्यांची समजतांच रोखडीच मुख्यमंत्री डॉ. प्रमोद सावंत हांची भेट घेतली. तांकां ह्या रस्त्यांची कामां जावप गरजेचीं अशें सांगून, कामांची प्रक्रिया जाल्या ताची मंजुरी दिवपाची मागणी केली. २०२४ च्या अर्थसंकल्पांतल्यान ह्या रस्त्याच्या कामांचीं बिलां काडटले. मात मुख्यमंत्र्यान रोखडीच मंजुरी दिली. भौशीक बांदकाम खात्यानूय अंदाजपत्रक तयार करपा पसून वर्क ऑर्डर मेरेनचीं कामां केलीं. अधिकार्यां कडेन बरे तरेन वागिल्ल्यान तांणीय कामांक वेग दिलो. ठेकेदार नायर हांणी बाणावले बरें काम केलां. तांणी केन्नाच कमिशनाची मागणी करूंक ना, ताका लागून ते परत काम करपाक आयल्यात. हे विशीं कोणेंय विचारल्यार जाता, अशेंय व्हिएगस हांणी म्हणलें.
मजगतीं, केळशी रस्त्याचे वटेन कॉरिडोर करून सोबितीकरणाचें काम करतले. हामिमाला पसून रस्त्या कुशीक फुटपाथ, रस्त्या वयले दिवे, सोबितीकरणाचीं कामां करतले, असो विचार आसा. हे खातीर थळाव्यांचें फाटबळ मेळपाची गरज आसा. हाचो फायदो वेवसायीक आस्थापनां सयत थळाव्यांक जातलो. बाणावलेचे उदरगती खातीर तयार आशिल्ल्याचेंय व्हिएगस हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
