भांगरभूंय | प्रतिनिधी
डेहराडून, खबरां संस्था ः उत्तराखंड वक्फ बोर्डा खाला चलपी 117 मदरशांनी आतां रामाचें चरित्र शिकयतले. मदरशांच्या नव्या अभ्यासक्रमांत हाचो आस्पाव केला. वक्फ बोर्डाचे अध्यक्ष शादाब शम्स हांणी दिल्ले म्हायती प्रमाण, मार्च म्हयन्यांतल्यान मदरसशांचो अभ्यासक्रम बदलतले आनी रामाचें चरित्र अभ्यासक्रमांत आस्पावतले.
शम्स हांणी सांगलें, अंदूं मार्चांत सुरू जावपी सत्रांत नवो अभ्यासक्रम चालीक लायतले. श्रीराम हो सगळ्यां खातीर आदर्श. तांचे विशीं सगळ्यांक खबर आसूंक जाय आनी तांचे अनुकरण करुंक जाय. मदरशांतल्या विद्यार्थ्यांक प्रेशीत महंमद हांचे वांगडा श्री रामाचें जिवीतय शिकयतले.
देशभरांत राममूर्तीच्या प्राणप्रतिष्ठे विशीं उमेद आशिल्ली. देखून मदरशांनय रामाचो आदर्श शिकवचो अशें आमकांय दिसलें. अल्लामा इक्बाल हो आमचो फामाद कवी जांणी भगवान रामाक इमाम ए हिंद म्हळ्यार भारताचो फुडारी, भारताचो राजा अशें म्हणलां. भारतीय मुसलमान समाजानय रामाच्यो कथा वाचूंक जाय. आमी आमच्या पूर्वजांक बदलूंक शकनात, पूण बदल करूं शकता अशेंय शादाब शम्स हांणी म्हणलें.
भगवान राम सगळ्यांचो. बापायचें उतर पाळपा खातीर सगळें त्याग करपी राम सारको पूत. ताका आदार दिवपी लक्ष्मणा सारको भाव आनी ताची बायल सीता सारकिल्यांचो आदर्श दवरपाक कोणांक आवडचे ना? आमी मदरशांतल्यान औरंगजेब शिकयचे नात. पूण आमी आमच्या भुरग्यांक रामाचो आदर्श नक्कीच शिकयतले. कारण औरंगजेबान राज्या खातीर आपल्या बापायक आनी भावाक मारून उडयल्लो. हो इतिहास शिकवपा परस रामाचें चरित्र शिकवप सदांच बरें अशेंय शम्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
