संसदेत व्हिजिटर्सांच्या प्रवेश पद्दतीत बदल : बायोमेट्रीक तपासणी, स्मार्ट कार्ड सादर करपाची गरज

भांगरभूंय | प्रतिनिधी

13 डिसेंबराक जाल्ल्या हल्ल्या उपरांत निर्णय

नवी दिल्ली, खबरां संस्था ः संसद भवन संकुलांत भेटेक आयिल्ल्याच्या प्रवेशा खातीर नवी वेवस्था केल्या. हे बदल 31 जानेवारी सावन सुरू जावपी अर्थसंकल्पीय अधिवेशनांतल्यान लागू जातले. ही प्रक्रिया तीन टप्प्यांनी जातली. हाचे खाला संसदेचें कामकाज पळोवपा खातीर व्हिजिटर्सांक क्यूआर कोड स्कॅन करचो पडटलो. संसदेंत येतना व्हिजिटर्सांक क्यूआर कोड आनी आधार कार्डांची प्रिंट आउट हाडची पडटली. ते उपरांत ताका स्मार्ट कार्ड दितले. टॅप आनी बायोमेट्रीक तपासणी केल्या उपरांतच ताका संसदेंत प्रवेश मेळटलो.
संसदेंत वतना ताका आपलें स्मार्ट कार्ड जमा करचें पडटलें, ना जाल्यार ताका आपोआप ब्लॉक करून ब्लॅकलिस्टान घालतले. ते उपरांत ताका परतून संसदेच्या आवारांत प्रवेश मेळचो ना.
खरें म्हणल्यार हो बदल 13 डिसेंबराच्या घडणुके उपरांत केला. जेन्ना व्हिजिटरांच्या गॅलरींतल्यान दोग जाणांनी खासदारांत उडी मारून घोशणा दिल्यो.
31 जानेवारीक सांजवेळा 4 वरां मेरेन व्हिजिटर्सांक अर्थसंकल्पीय अधिवेशनाच्या पासा खातीर अर्ज करपाक मेळटले. इतलेंच न्हय तर खासदारांक त्या दिसा खातीर व्हिजिटर्स गॅलरी खातीर फकत एक पास अर्ज करपाक सांगलां. हातूंत खासदारांच्या जोडप्यांकय प्राधान्य दितले.
खासदारांक तांच्या सोयऱ्यांक/ व्हिजिटर्सांक पब्लीक गॅलरी पास अर्जा वांगडा तांचो योग्य पत्तो, फोन नंबर आनी आधार कार्डाची प्रत सादर करची असो सल्लो दिलां. व्हिजिटर्सांची गॅलरी भरल्यार फुडले पास रोखडेच बंद जातले. खासदारांक अंतरीम अर्थसंकल्पांत गॅलरी पास खातीर फकत ऑनलायन अर्ज करपाची सुचोवणी दिल्या.