भांगरभूंय | प्रतिनिधी
गोंयांतल्या उद्देगीक उदरगतीक, सहकार्याक मेळटली उर्बा
पणजीः गोंय उद्देगीक विकास म्हामंडळ (गोंय -आयडीसी) आनी भारतीय उद्देग म्हासंघ (सीआयआय) हांच्या पालवान उद्देग क्षेत्रांतले मानेस्त आनी मुखेल भागधारकांक एकठांय हाडून तांचे मदीं संवाद आनी सहकार्य संबंद वाडोवन गोंयांत अर्थीक गुंतवणुकीक उर्बा दिवपाच्या हेतान ‘इन्व्हेस्ट गोंय 2024’ ही शिखर परिशद आयोजीत केल्या. हे परिशदे खातीर सीआयआयची राष्ट्रीय भागिदार म्हूण भुमिका आसतली. गोंय-आयडीसी सयत गोंय-आयपीबी आनी सीआयआय हांचे सयत 29 जानेवारीक दोनापावला ताज- सिदाद- गोवा हॉटेलांत ही परिशद आयोजीत केल्या.
परिशदे मजगतीं, उद्देग क्षेत्रांतले फुडारी आनी प्रतिनिधी संवाद सादतले. हे परिशदेंत विवीध सत्रां आनी चर्चासत्रांनी आदले केंद्रीय मंत्री सुरेश प्रभू, सीआयआयचे अध्यक्ष आनी टीव्हीएस सप्लाय चेन सोलशुन्सचे अध्यक्ष आर. दिनेश, सीआयआयचे सरसंचालक चंद्र्रजीत बॅनर्जी, सीआयआय पश्चीम विभागाचे आदले चॅरमन आनी रसना इंटरनॅशनल लिमिटेडचे सीएमडी पियुष खंबाटा, सीआयआय पश्चीत विभागाचे उपाध्यक्ष आनी व्हीएम. साळगांवकार अँण्ड ब्रदर्स प्रा. लि. च्यो अध्यक्ष स्वाती साळगांवकार, सेंटर फॉर फोर्थ इंडस्ट्रियल रिव्होलुशन डब्लूईएफ इंडियाचे पुरुषोत्तम चंद्र कौशीक, डेलॉइट इंडियाचे भागीदार सतीश गोपालिहा, टीव्हीएस इंडस्ट्रियल अँड लॉजिस्टीक पार्कचे रामनाथ एस. आनी जीसीसीआयचे अध्यक्ष तशेंच धेंपो ग्रुप ऑफ कंपनीजचे चेअरमन श्रीनिवास धेंपो आदीं मानेस्तांचो सहभाग आसतलो.
गोंयचे मुख्यमंत्री डॉ. प्रमोद सावंत, उद्देग मंत्री मॉवीन गुदिन्हो, गोंय-आयडीसीचे अध्यक्ष आलेक्स रेजिनाल्ड लॉरेन्स, गोंय आयडीसीचे वेवस्थापकी संचालक प्रविमल अभिषेक (आयएएस), गोंय उद्देगीक गुंतवणूक प्रोत्साहन मंडळ (आयपीबी)च्याे सीईओ श्रीमती स्वेतिका सचान आदीं मानेस्तांची परिशदेंत हाजेरी आसतली.
हे परिशदेंत गोंयांतल्या मुखेल वेवसाय क्षेत्रा विशीं 24 वक्ते विवीध सत्रांनी संबोधीत करतले. राज्य सरकारच्या म्हत्वाच्या उद्देगीक सुदारणा आनी नव्या धोरणा विशीं परिशदेंत चर्चा जातली. विवीध वेवसाया क्षेत्रां कडेन संबंदींत संस्था, उद्देग, कंपनींचे मुख्य कार्यकारी अधिकारी, वरिश्ठ वेवसाय अधिकारी, उद्देगतज्ञ आनी सरकारी अधिकारी हांचीय हाजेरी परिशदेंत आसतली.
हे परिशदेंत ‘गोंय आयडीसीच्या नेमावळ पुस्तिकेचे अनावरण जातलें. गोंय-आयडीसी वरवीं राज्यांतल्या उद्देग क्षेत्रांच्या उदरगतीक चालना दिवप आनी राज्याची वेवसाय सुलभता वाडोवप ह्या उद्देशान आपल्या नेमावळींत आनी नियमन प्रक्रियेंत जायत्यो सुदारणा केल्यात. ह्या सुदारीत नेमांचें संकलन हे पुस्तिकेंत केलां. नव्या नेमांक लागून राज्यांतल्या उद्देगीक आनी अर्थीक गुंतवणूकीचीं दारां उक्तीं जातलीं. तशेंच उद्देग क्षेत्रांक पुश्टीक वातावरण निर्माण जातलें.
परिशदेंतल्या राष्ट्रीय सत्रांत वांटेकार जावपी मुखेल प्रतिनिधींत नेदरलँडचे उप-कावंन्सील जनरल थियरी व्हॅन हेल्डन, युरोपस्टॅम्पा-इटलीचे संस्थापक लुसियानो सिलारियो, आनी युरोपीय महासंघ वाणिज्य चेंबरच्या भारतांतले संचालक रेणू शर्मा आदींचा आस्पाव आसतलो.
परिशदेंतल्या चर्चेच्या केंद्र सुवातेर लॉजिस्टीक आनी गुदांव, आयटी आनी आयटीईएस ही उद्देग क्षेत्रां आसतली. तशेंच राष्ट्रीय सत्रांत गोंयांत भेट परकी गुंतवणूक (एफडीआय) आकर्शीत करप आनी हेर देशां वांगडा सहकार्या खातीर मुखेल क्षेत्रां निश्चीत करून निर्यात वाडोवपाचेर भर आसतलो.
वेवसायीक गुंतवणूक, धोरणात्मक भागिदारी आनी सहकार्य वाडोवप आनी उद्देगीक गुंतवणुकी खातीर गोंय राज्याक मुखेल आनी आकर्शक केेंद्र म्हूण सादर करपा खातीर ‘इन्व्हेस्ट गोंय 2024’ परिशद ही एक प्रेरक उपक्रम थारतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
