भांगरभूंय | प्रतिनिधी
डॉ. काझी: पर्वरे रोखडोच फांटो; पुरस्कार म्हजो न्हय, संस्थेचो
पणजी: म्हाका मेळिल्लो पद्मश्री पुरस्कार हो म्हाका न्हय, जाल्यार म्हज्या अंजुमन इस्लाम संस्थेक मेळ्ळा. अंजुमन इस्लामाचो फांटो रोखडोच पर्वरे सुरू करून संस्थेचें गोंयांतूय कार्य वाडयतले अशें पद्मश्री पुरस्कार जैतिवंत आनी मूळ गोंयकार आशिल्ले नामनेचे रेडिओलॉजिस्ट डॉ. जहीर काझी हांणी ‘भांगरभूंय’ कडेन उलयतना सांगलें.
गोंयच्या मुस्लीम समाजांतले पयले दोतोर म्हूण भोवमान मेळयिल्ले डॉ. काझी हे मूळचे फोंडेंचे. फोंड्यां आल्मेदा हायस्कूल, धेंपे म्हाविद्यालय आनी उपरांत बांबोळे गोंय वैजकी म्हाविद्यालयांत वैजकी शिक्षण असो डॉ. काझी हांचो प्रवास.
नोकरे निमतान ते मुंबयंत स्थायीक जाले. वैजकी मळार तांच्या कार्याची दखल घेवन केंद्र सरकारान तांकां हालींच पद्मश्री पुरस्कार जाहीर केला. हे फाटभुंयेर संवाद सादलो तेन्ना डॉ. काझी हांणी स्वता अध्यक्ष आशिल्ल्या अंजुमन इस्लाम संस्थेच्या कार्याचेर उजवाड घालो. अंजुमन इस्लाम संस्थेचे 97 फांटे आसात. ह्या फांट्यांतल्यान केजी सावन पीएचडी मेरेन शिक्षण दितात. संस्था चलयां खातीर दोन अनाथालयां चलयता. तशेंच निवारो केंद्रूय चलयता. अंजुमन इस्लामाच्या संस्थां मदीं सद्या 1.10 लाख विद्यार्थी शिक्षण घेतात. हे संस्थेंत फक्त मुस्लीम धर्माचेच न्हय जाल्यार सगल्या जाती धर्मांतले विद्यार्थी शिक्षण घेतात अशें तांणी सांगलें.
अंजुमन इस्लाम ही स्वातंत्र्य सैनिकांनी 150 वर्सां पयलीं स्थापन केल्ली संस्था आसा. फाटलीं 40 वर्सां आपूण हे संस्थेंत कार्यरत आसा आनी 15 वर्सां सावन अध्यक्षपद सांबाळटां अशें तांणी म्हणलें. सगल्या जाती-धर्मांतल्या विद्यार्थ्यांचो शिक्षणीक नदरेन सर्वांगी विकास सादपाचो यत्न संस्थे कडल्यान जाता. ताका लागून गरीब विद्यार्थ्यांक फी लेगीत माफ करतात अशें तांणी म्हणलें.
अंजुमन इस्लामाच्यो ज्यो संस्था अनुदानीत आसात, तांकां सरकारा कडल्यान निधी मेळटा. पूण इंग्लीश माध्यमाच्यो संस्था विनाअनुदानीत आसात. संस्थेचीं 16 म्हाविद्यालयां तशेंच 15 कनिश्ठ म्हाविद्यालयां कार्यरत आसात. हातूंतलें फक्त एकूच म्हाविद्यालय अनुदानीत आसा. खूबशे ट्रस्ट, दानशूर लोक संस्थेक अर्थीक हातभघर लायत आसतात. ताका लागूनच संस्थेची उदरगत जायत आसा आनी विद्यार्थ्यांक दर्जेदार शिक्षण मेळत आशिल्ल्याचें तांणी म्हणलें.
18 वरां करता काम
गोंयांत रावन वैजकी मळार करियर करचें अशें आपल्याक केन्ना तरी दिसतालें. पूण, मुंबय हे सपनांचें शार आशिल्ल्यान सपन पुराय करपा खातीर आपणें मुंबयची वाट धरली. गोंयकार गोंयांत रावल्यार सुसेगाद आसता. भायर सरतकूच सक्रीयपणान काम करता. आपले बाबतींत नेमकें तेंच घडलें. फाटलीं 42 वर्सां आपूण वैजकी आनी शिक्षणीक मळार 18-18 वरां काम करतां अशें डॉ. जहीर काझी हांणी म्हणलें.
ध्येयाचेर लक्ष केंद्रीत करात
गोंयकार विद्यार्थ्यांक संदेश दितना डॉ. काझी हांणी म्हणलें, ज्या मळार काम करपाचें आसा त्या मळार विद्यार्थ्यांनी स्वताक ओंपून घेवंक जाय. शॉर्टकटाचो मार्ग स्किारिनासतना प्रामाणीक रावन, जिद्द, चिकाटेन अभ्यास करूंक जाय. ध्येयाचेर लक्ष केंद्रीत केल्लें यत्न केन्नाच फुकट वचनात अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
