भांगरभूंय | प्रतिनिधी
खबरां संस्था
हैदराबादः पांच टॅस्ट मॅचींच्या माळेंतले पयले टॅस्टींत इंग्लंडान भारताक 28 धांवड्यांनी हारयले. भारताक जैता खातीर इंग्लंडान 231 धांवड्यांचें लक्ष्य दिल्लें. मात भारतीय बॅट्समन फकत 202 धांवड्यो करपाक शकले. स्पीन बॉलरांक हात दिवपी खेळपट्टेर भारतीय पंगड आपल्याच जाळ्यांत फारावलो. इंग्लंडाच्या ह्या जैताचे शिल्पकार थारले ऑली पोप आनी सात विकेटी घेवपी टॉम हार्टली.
हे मॅचींत इंग्लंडाच्या स्पिनरांनी वट्ट 19 विकेटी घेतल्यो. दोनूय डावांत भारताचो एकलोच बॅट्समन रनआवट जालो. हे मॅचींत सुरवेक फाटीं पडल्ल्या इंग्लंडाक ऑली पोपान 196 धांवड्यो करून पंगडांक घटमूट स्थितींत हाडलें. बाकीचें काम टॉम हार्टलीन केलें. विशेश म्हणल्यार तो आपले क्रिकेट कारकिर्दींतली पयलीच टॅस्ट मॅच खेळटालो. हार्टलीन 62 धांवड्यांत 7 विकेटी घेतल्यो.
पयल्या डावांत 190 धांवड्यांनी फाटीं पडल्या उपरांत इंग्लंडान भारताक जैता खातीर 231 धांवड्यांचें लक्ष्य दिल्लें. मात भारतीय पगंड 202 धांवड्यांत आवट जालो. भारताच्या दुसऱ्या डावांत रोहीत शर्मान सगल्यांत चड 39 धांवड्यो केल्यो. विकेटीकीपर श्रीकर भरतान 28 आनी अश्टतासी रविंचंद्रन आश्विनान 28 धांवड्यो केल्यो. हार्टलीन 7 जाल्यार जो रुट आनी जॅक लीच हाणी दरेकी एक विकेट घेतली.
मॅचीच्या चवथ्या दिसाचे सुरवाती मेरेन भारतीय पंगड मजबूत स्थितींत आशिल्लो. मात ह्या दिसाच्या निमणे इंग्लंडान अजापाची कामगिरी करून मॅच जिखली. 190 धांवड्यांनी फाटी पडल्ले कडेन आसतना इंग्लंडान ही मॅच जिखली, रोहीत शर्मा आनी येसस्वी जयस्वाल (15) ह्या ओपनरांनी 42 धांवड्यांची सलामी दिली. टॉम हार्टलीन जयस्वालाक कॅच आवट केलें. शुभमन गिलाक हॉर्टलीन शून्याचेर कॅच आवट करून भारताची स्थिती 2 आवट 42 अशी केली. रोहीत केएल राहुला वांगडा डाव साल्वार करतलो अशें दिसतालें तेन्ना जो रूटना राहुलाक (22) एलबीडब्ल्यू केलें आनी भारताची घसरगुंडी सुरू जाली. अक्षर पटेल (17), श्रेयस अय्यर (13) आनी रवींद्र जडेजा (2) सवाय भितर आवट जाले. श्रीकर भरत आनी आश्विनान जैताची मात्शी आस्त दाखयली. मात भरताक हार्टलीन बोल्ड करून पंगडाच्या जैताची वाट मेकळी केली.
पंगड म्हणून आमी अपेशी
पयले टॅस्ट मॅचींत हार खावचे पडले खातीर भारताचो कॅप्टन रोहीत शर्मान नाराजी उक्तायली. जसप्रीत बुमराह आनी महम्मद सिराज हांणी तग धरून पांचवो दीस खेळून काडचो अशी आमची इत्सा आशिल्ली अशें ताणे सांगलें. चूक खंय जाली हे सांगप कुस्तार आसा. 190 धांवड्यांची आघाडी मेळ्ळ्या उपरांत आमी मॅचींत खूब फुडें आसात अशें दिसतालेंय मात ऑली पोपान बरी बॅटिंग केली. भारतीय परिस्थितींत परदेशी बॅट्समना कडल्यान आमी पळयल्ले सर्वोत्तम खेळींतली पोपची एक आसा अशेंय रोहितना सांगलें.
आमी अचूक टप्प्यार बॉलींग केली आनी प्लेनींक केलें, मात एक पंगड म्हणून आमी अपेशी थारले. आमी बरी बॅटिंग केली ना अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
