भांगरभूंय | प्रतिनिधी
-केंद्रीय शिक्षण खात्याच्या अहवालातली म्हायती
पणजी: गोंयांत 2017-18 ते 2020-21 मजगतीं, उच्च शिक्षणा खातीर प्रवेश घेवपांत चल्यांचे तुळेंत चलयो फुडें आशिल्ल्यो. पूण चार वर्सांत पयलेच खेपे हें प्रमाण उणें जालां. 2021-22 त चल्यांचें तुळेंत चलयांच्या प्रवेशाचें प्रमाण वट्ट 8.22 टक्क्यांनी उणें जालां. केंद्रीय शिक्षण खात्यान केल्ल्या अखील भारतीय उच्च शिक्षण सर्वेंतल्यान ही म्हायती मुखार आयल्या.
अहवाला प्रमाण, 2017-18 ह्या शिक्षणीक वर्सांत उच्च शिक्षणा खातीर वट्ट 49,641 विद्यार्थ्यांनी प्रवेश घेतिल्लो. हातूंतले 24,743 चले (49.85 टक्के) जाल्यार 24,898 चलयो (50.15 टक्के) अाशिल्ल्यो. जाल्यार 2021-22 त उच्च शिक्षणा खातीर वट्ट 65,415 चल्यांनी प्रवेश घेतिल्लो. हातूंतले 35,398 विद्यार्थी (54.11 टक्के) जाल्यार 30,017 चलयो (45.89) टक्के आशिल्ल्यो.
2018-19 ह्या शिक्षणीक वर्सांत उच्च शिक्षणा खातीर प्रवेश घेवपी चल्यां मदीं चलयांचे प्रमाण 50.6 टक्के जाल्यार चल्यांचे प्रमाण 49.31 टक्के अाशिल्ले. 2019-20 त चलयांचे प्रमाण 52.54 टक्के जाल्यार चल्यांचे प्रमाण 47.48 टक्के आशिल्ले. 2020-21 त उच्च शिक्षणा खातीर प्रवेश घेवपी विद्यार्थ्यां मदीं चलयांचें प्रमाण 51.23 टक्के जाल्यार चल्यांचे प्रमाण 48.78 टक्के आशिल्ले.
ह्या सर्वेक्षणांत पदवी, पदव्युत्तर पदवी, पीएचडी, एम फील, पीजी डीप्लोमा, डीप्लोमा, सर्टिफिकेट कोर्स आनी इंटिग्रेटेड कोर्स खातीर प्रवेश घेतिल्ल्या विद्यार्थ्यांचो अभ्यास केलो.
2021-22 त पीएचडी, एमफील, सर्टिफिकेट कोर्स, इंटिग्रेटेड कोर्स, पीजी डीप्लोमा, डीप्लोमा ह्या अभ्यासक्रमांत चलयां परस चल्यांचें प्रमाण चड आसा. जाल्यार पदवी आनी पदव्युत्तर पदवी अभ्यासक्रमा खातीर चलयांचें प्रमाण चड आसा.
एसटी समाजांत चलयांच्या प्रवेशाचें प्रमाण चड
अहवाला प्रमाण, 2017-18 ते 2021-22 मजगतीं, उच्च शिक्षणा खातीर प्रवेश घेवपी एसटी समाजांतल्या विद्यार्थ्यां मदीं चलयांचें प्रमाण चल्या परस चड आसा. 2021-22 त एसटी समाजांतल्या वट्ट 4,889 विद्यार्थ्यांनी उच्च शिक्षणा खातीर प्रवेश घेतिल्लो. हातूंत 2,783 चलयो (56.93 टक्के), जाल्यार 2,106 चलयो (43.07 टक्के) आशिल्ल्यो.
लींग समानता निर्देशांक देंवलो
सर्वेक्षणांत राज्यांतल्या चल्यांचे तुळेंत चलयांच्या प्रमाणा वयल्यान लींग समानता निर्देशांक (जेंडर पॅरिटी इडेंक्स) काडटात. गोंयांत 2017-18 ते 2020-21 त हो निर्देशांक 1 परस चड आशिल्लो. 2017-18 ह्या वर्सा हो निर्देशांक 1.14 टक्के आशिल्लो, जाल्यार 2021-22 त तो उणो जावन 0.99 टक्के इतलो जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
