भांगरभूंय | प्रतिनिधी
सुकूर ग्रामसभेंत गांवकारांची मागणी
पर्वरी, प्रतिनिधी : सुकूर ग्रामसभेंत आयज विवीध विशयांचेर चर्चा जाली. हातूंत राष्ट्रीय महामार्ग क्र. १७ वयली येरादारी कोंयडी, सुकूरचो घाणयार्या उदकाची प्रक्रिया प्रकल्प, जैवविविधता, भोवमजली संकुलांक टीसीपी परवानग्यो अश्या जायत्या मुद्यांचो आसपाव आसलो.
राज्यांतल्या विस्कळीत येरादारी वेवस्थापनाक लागून ओ’कोकेरो जंक्शन ते सुकूर बाजार ह्या रस्त्याचेर येरादारी कोंयडी जावप सदची गजाल. राष्ट्रीय महामार्गार गाडी, दोनचाकी आनी हेर शोरूमांक भेट दिवपी गिरायकां आपलीं वाहनां रस्त्याचेर पार्क करतात. जाका लागून हीं वाहनां आडखळ निर्माण करतात. रस्त्यार तैनात आशिल्ले येरादारी पुलीसूय हाचेर नियंत्रण दवरपाक शकनात. ताका लागून सदांच ह्या रस्त्याचेर वाहनांची कोंयडी जाल्ली पळोवपाक मेळटा. अपघात जाल्यार परिस्थिती येरादारी पुलिसांच्या नियंत्रणा भायर वता. येरादारी विभागान ह्या रस्त्याचेर वाहनां उबीं करपाक परवानगी दिवची न्हय, अशी मागणी समाजीक कार्यकर्ते सॉर्टर डिसोझा हांणी केली.
टावन आनी कंट्री प्लॅनींग विभाग मालमत्तेच्या कागदपत्रांचो तपास करिनासतना भोवमजली निवासी संकुलांक तांत्रीक मंजुरी दितात. जेन्ना ही फायल ग्रामपंचायती मेरेन पावता तेन्ना तांकां इमारतीच्या बांधकामा खातीर एनओसी दिवपाची सक्ती करतात. पंचायतीन आक्षेप घेतल्यार बिल्डर पंचायत संचालनालयांत वचून खंयच्यान हेर मार्गान एनओसी घेता. ही सामकी चुकीची प्रक्रिया. पयलीं फायल पंचायतीकडेन येवची आनी जमनीचे मालकेची सगळीं कागदपत्रां तपासल्या उपरांत फायल तांत्रीक मंजुरी खातीर टीसीपीकडेन वचची अशें डिसोझा हांणी फुडें सांगलें.
सुकुरची सरपंच सोनिया पेडणेंकार हांणी सगळ्यांक येवकार दिलो. पंचायत सचीव सतीश गणवास हांणी फाटले ग्रामसभेचे इतिवृत्त वाचलें. जाल्यार पंच वांगडी आर. पार्सेकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
