भांगरभूंय | प्रतिनिधी
ल्हान भुरगीं, तरणाटे, जाण्टे सगळे स्मार्टफोन मोबायलाचो वापर मोट्या प्रमाणांत करतात. ऑफिसांत वा घरा कडेन कम्प्युटराक लागून मॉनिटर स्क्रीन वापरचो पडटा. ह्या सगळ्यांचो परिणाम दोळ्यांचे भलायकेचेर जाता व्हय?
आतांच्या डिजिटल काळांत सगळ्यांकच स्क्रीनीचो वापर करचो पडटा. हाचो परिणाम जाता. स्क्रीनटायम चड आसल्यार दोळे चुरचुरप, व्हांवप, दोळे दुखप, दोळे ’ड्राय’ जावप अशे प्रकार जातात. तरीय चड स्क्रीन वापरली जाल्यार तकली दुखप, मान वळप, घुंवळ येवप, खंयचीय एक गजाल दोन दिसप, दोळ्यां मुखार काळोख येवप, अशींय लक्षणां उप्रासूं येतात. वक्ल आशिल्ल्यांचो नंबर वाडटा आनी जांकां वक्ल लागूंक ना, तांकां दोळे तपासतकच तें लागता अशें आतां मेरेन दिसून आयलां. हे खातीर सगळ्यांनी स्क्रीन टायमाचेर नियंत्रण दवरपाक जाय.
रक्तदाब आनी गोडेमूत आसल्यार ताचो परिणाम दोळ्यांचेर म्हणजे नदरेचेर कसो कितें जाता? कसली जतनाय घेवची पडटा?
नियंत्रणांत नाशिल्लो रक्तदाब आनी गोडेमूत हीं दोनूय दुयेंसां दोळ्याच्या दृश्टीचेर परिणाम करतात. रक्तदाब चड जाल्यार दोळ्याची शीर फुटून वा ब्लॉक जावन ताचो रक्तस्त्राव जाता. गोडेमूताचेर नियंत्रण हाडलें ना जाल्यार परत परत वक्लाचो नंबर बदलपाक शकता. दोळ्याक कसलेंय इनफॅक्शन चड सोंपेपणान जावंक शकता. मोतीबिंदू बेगीन जावंक शकता. अशे प्रकार जाले जाल्यार दुयेंतीक दिसपा पासून त्रास जावंक शकतात. हाचेर उपाय म्हणल्यार रक्तदाब आनी गोडेमूत हाचेर जागृत रावून वेळोवेळ तापसणी करून घेवप आनी दुयेंसां जावचीं न्हय म्हूण यत्न करप.
मोतीबिंदू म्हळयार कॅटरॅक्ट खंयच्या पिरायेचेर जावपाची शक्यताय चड आसता? लक्षणां सांगशात? शस्त्रक्रियेन नदर पुरायेन येता?
मोतीबिंदू तसो ल्हान भुरग्यांक वा जाण्ट्यांक कोणाकूय जावंक शकता आनी ताचीं कारणां वेगवेगळीं आसतात. पूण चड करून आमी पळयात तो सिनायल कॅटरॅक्ट तो पन्नाशी मागीर जाता. हाचीं लक्षणां म्हणल्यार दृश्टी धूसर जावप, दोळे व्हांवप, उजवाड दोळ्यांचेर मारल्यार दोळ्यां मुखार काळोख येवप, केन्नाकेन्नाय दोब्रान दिसप, वा इंद्रधनूचे रंग दिसप अशेंय जाता. मोतीबिंदू सोडून आनीक कसलेंच दुयेंस नासत जाल्यार शस्त्रक्रिये उपरांत नदर पुराय बरी जाता.
कॉण्टॅक्ट लेन्सीचे फायदे कितें आनी दुश्परिणाम कितें?
वक्ल लावपाक जांकां नाका, वा जांकां त्रास जाता तांकां कॉण्टॅक्ट लॅन्स लावप हो उपाय आसा. चड करून खेळगडे, फॅशन आर्टिस्ट, कलाकार हांकां चड फायदो जाता. तशेंच जांचे वक्लाचे नंबर चड आसतात तांकांय कॉण्टॅक्ट लॅन्सीचो फायदो जाता. दोतोराच्या मार्गदर्शना प्रमाणें जर कॉण्टॅक्ट लॅन्स बसयली आनी उपरांत कितें करप आनी कितें टाळप हाचेर लक्ष दवरल्यार ताचो वायट परिणाम जायना. कॉण्टॅक्ट लॅन्स लावन न्हिदपाक जायना, न्हावपाक जायना, तशेंच ती कितली मेरेन वापरप हाकाय मर्यादा आसता, देखून ह्या सगळ्या गजालींक पाळो दिवनूच ती वापरची.
टेक्नॉलॉजी विस्तारत आसा. दोळ्यांचे उपचार आनी सर्जरी हे खातीर नव्या तंत्रगिन्यानाचो कसो कितें फायदो जाता?
दोळ्यांच्या तपासणेंत आनी उपचारांत आतां नव्या तंत्रगिन्यानाचो उपेग जाता. आदीं जीं दुयेंसां कळ नाशिल्लीं तीं आतां रोखडींच कळटात आनी ताचें निदान बेगीन करपाक मेळटा. तशेंच आदीं ज्या गजालीं खातीर शस्त्रक्रिया करपाक मेळनाशिल्ली ती आतां करपाक मेळटा आनी दुयेंतीकय ताचो लाव जाता. तंत्रगिन्यानाक लागून शस्त्रक्रिये उपरांत जे निर्बंध आसताले ते लेगीत आतां कमी जाल्यात आनी कांय दिसांनी आपल्याक कामूय करपाक मेळटा. पूण हें सगळें करतना दोतोराचें सांगणें आयकूनच मुखारलीं पावलां मारप गरजेचें आसता.
खूब लोकांक दोळ्यांत गुलाबाचें उदक घालपाचीं संवय आसता. हें दोळ्यां खातीर कितलें सुरक्षित आसा?
मार्केटांत जें गुलाबाचें उदक मेळटा तें दोळ्यांत घालपाक मेळना. तें कातीक लावपाचें आसता. पूण हें मतींत घेनासतना खूब लोक तें उदक दोळ्यांत घालतात. हाचो खूब वायट परिणाम आमकां पळोवपाक मेळटा. दोळे झळझळटात, तांबडे जातात, तशेंच दोळ्याच्या कॉर्नियाक लेगीत ताचो मार बसपाक शकता.
‘दोळे येतात’ तेन्ना लोक घरांतले उपाय करतात. ते करप सारकें ? कांय तातून आनीक त्रास जातात?
दोळे येतात तेन्ना दोळें थंड दिसपाक उदकाची घडी दवरल्यार जाता. पूण दूद, तेल वा कोथंबिरेचें उदक दोळ्यांत भितर घालप हें बरोबर न्हय. हाका लागून इनफॅक्शन वाडूंक शकता.
ग्लुकोमा म्हळ्यार कितें, ताचीं मुखेल लक्षणां कितें?
दोळ्यांचो प्रेशर वाडून ऑप्टिक नर्व डॅमेज जावप म्हणल्यार ग्लुकोमा. हातूंत ओपन आनी क्लोज अशे दोन प्रकार आसतात. क्लोज्ड प्रकारांत दोळे तांबडे जावप, दुखप आनी दृश्टी कमी जावप हीं लक्षणां, तर ओपन प्रकारांत व्हडलींशीं लक्षणां जायनात. दुयेंती सदचे भशेनच उपचाराक येता तेन्ना दोतोर ताचें निदान करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
