रोहन बोपन्नान इतिहास घडयलो

भांगरभूंय | प्रतिनिधी

रोहन बोपन्ना- मॅथ्यूज एब्डन हे भारत-ऑस्ट्रेलियेचे जोडयेन ऑस्ट्रेलियन ओपनाच्या दादल्यांच्या दोट्टी गटांतलें वस्तादपण जोडलें. बोपन्ना-एब्डन जोडयेन सिमोने आनी अॅण्ड्रिया हे इटालीचे जोडयेक 7-6 (7-0) आनी 7-5 अशा सरळ सेटांनी हारयली.

दादल्यांच्या दोट्टी गटांत बोपन्नान 43 वर्सां पिरायेचेर पयलो स्लॅम किताब जिखलो. हाचे पयलीं बोपन्ना अमेरिकन ओनपांत दोन खेपे फायनलींत पाविल्लो. ताणें 2013 आनी 2023त फायनलीत पाविल्लो. पूण, दोनूय खेपे ताका किताबान हुलकावणी दिल्ली. अखेरेक ऑस्ट्रेलियन ओपनांत दादल्यांच्या दोट्टी गटांत वस्तादपण जोडून बोपन्ना ओपन अॅरांत दादल्यांच्या दोट्टी गटांत ग्रॅण्ड स्लॅम किताब जिखपी सगल्यांत जाण्टो टॅनीस खेळगडो थारलो.

बोपन्ना-एब्डन हे जोडयेन पयल्या सेटांत बरी सुरवात केली. पूण, इटालीचे जोडयेन खर प्रतिकार करीत सेट टायब्रेकरा मेरेन व्हेलो. टायब्रेकरांत बोपन्ना-एब्डन जोडयेन हो सेट 7-6 (7-0) अशा फरकान जिखलो.

दुसऱ्या सेटांत इटालीचे जोडयेन उत्कृश्ट खेळ करीत पयल्यो दोन गेमी जिखल्यो. तांणी 2-0 अशी आघाडी घेतली. पूण, अणभव बोपन्ना आनी एब्डन हे जोडयेन 3-3 अशी बरोबरी सादून दुसरो सेट लेगीत उमळशीक वाडोवपी स्थितींत हाडलो. पूण, चवथी गेम सिमोने आनी अॅण्ड्रिया हे जोडयेन जिखून परतून आघाडी घेतली. पूण, बोपन्ना-एब्डन जोडयेन प्रतिस्पर्धीची आघाडी मोडून काडून 5-5 अशी बरोबरी सादली. ते उपरांत भारत-ऑस्ट्रेलियेचे जोडयेन 7-5 फरकान जैत जोडून इतिहास घडयलो.