भांगरभूंय | प्रतिनिधी
म्हापशें, प्रतिनिधी ः कोलवाळ बंदखणींतल्या दोन मेट्रन आनी एका सुरक्षा रक्षकाचेर हल्लो केल्ल्यान युगांडांतल्या मिनामू हाफुसा हे बायल कैदीचेर कोलवाळ पुलीस स्टेशनांत गुन्यांव नोंद केला. बंदखण अधीक्षक शंकर गांवकार हांणी ही कागाळ दाखल केल्या.
बंदखणींत कैद्यांक हिंसक जावपाची घडणूक नवी न्हय. बंदखणींतल्या कैद्यां मदीं झगडीं, तांचे कडेन मेळपी आक्षेपार्ह वस्तू हाका लागून कोलवाळ बंदखणीचें नांव सदांच चर्चेत आसता. आतां हांगाचे एके बायल कैदीन सुरक्षा कर्मचाऱ्यांचेर हल्लो केल्याचे प्रकरण उजवाडाक आयलां.
मिनामू हाफुसा हिच्या आड म्हापशें जलतगती न्यायालयांत खटलो चलता. हे खातीर तिका कोलवाळ मध्यवर्ती बंदखणींत दवरल्या. हेच विदेशी बायलेन 23 तारखेक दनपारां 12.20 वरांचेर बंदखणीच्या मुखेल प्रवेशदाराचेर सुरक्षा कर्मचाऱ्यांचेर अचकीत हल्लो केलो. ताका लागून अस्मा खान, जयश्री चोडणकार आनी आशा वेंगुर्लेकार जखमी जाल्यात. तांकां घांस मारून तशेंच सेफ्टी स्टिकान हल्लो केलो. ह्या हल्ल्यांत सुरक्षा कर्मचाऱ्यांक जखम जाल्ल्याचें कागाळींत म्हणलां. ह्या प्रकरणांत कोलवाळ पुलिसांनी एफआयआर दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
