भांगरभूंय | प्रतिनिधी
फोंडें/ दिवचल, प्रतिनिधी ः अयोध्येंतल्या श्रीरामलल्ला मूर्ति प्राणप्रतिश्ठापणाच्या दिसा सोशल मिडियाचेर वादग्रस्त पोस्ट घालपी सुबानी दफेदार (लामगांव) हाका दिवचल पुलिसांनी अटक केल्या. घडणुके उपरांत 23 जानेवारी सावन तो फरारी आशिल्लो. मजगतीं, ह्या विशयाचेर आक्षेपार्ह पोस्ट घालपाच्या प्रकरणांत जागरूक नागरिकांनी दत्तगड – बेतोडेंच्या दोन तरणाट्यांक धरून फोंडें पुलिसांच्या ताब्यांत दिले. काल सावन ह्या वाठारांतल्या 8 नेण्टे भुरग्यांक चवकशी करपा खातीर पुलिसांनी ताब्यांत घेतल्यात.
अयोध्यांत श्रीरामलल्ला मूर्तिची प्राणप्रतिश्ठा सुवाळो चालू आसतनाच गोंयांत सोशल मिडियाचेर श्री राम आनी राम जन्मभूमि विशीं आक्षेपार्ह आनी वादग्रस्त पोस्ट केल्ल्याचे प्रकार उक्ते जाल्यात. 22 जानेवारीक लामगांवां भाड्याक रावपी तरणाटो सुबानी दफेदार हाणें हो पोस्ट पयली घाल्ल्याचे सोशल मिडियाचेर दिसून आयलें. ते उपरांत दिवचल पुलिसांनी ताचो सोद घेवपाचो यत्न केलो. पूण तो फरारी आशिल्लो. निमणें ताका अटक करपाक पुलिसांक येस आयलें. आयज ताका अटक केल्या.
मजगतीं, दत्तगड- बेतोडेंच्या दोग तरणाट्यांक श्रीरामाचेर अपमानकारक पोस्ट केल्ल्यान बिरेस्तारा रातीं जागृत नागरिकांनी धरून फोंडें पुलिसांच्या ताब्यांत दिले. शुक्रारा फोंडें पुलिसांनी ह्या प्रकरणांत आनीक 8 नेण्टे भुरग्यांक ताब्यांत घेतल्यात. ही पुलीस कारवाय चालू आसतनाच कुळे वाठारांतल्या एका चलयेन परतून आक्षेपार्ह पोस्ट घाल्ल्यान शुक्रारा सांजवेळार कुळे पुलीस स्टेशना मुखार वातावरण तापलें.
दत्तगडच्या तरणाट्यांनी सोशल मिडियाचेर श्री रामा विशीं आक्षेपार्ह पोस्ट घातल्या उपरांत बिरेस्तारा रातीं कांय तरणाट्यांनी उसगांवांत वचून दोगांय तरणाट्यांक बरेच बडयलें. ते उपरांत हिंदुत्ववादी संघटनांचे कार्यकर्ते फोंडें पुलीस स्टेशना मुखार रातीं मेरेन आशिल्लें. शुक्रारा दिसभरांत वट्ट 8 नेण्टे भुरग्यांक ताब्यांत घेवन तांची चवकशी केली. तशेंच परिस्थिती नियंत्रणांत दवरपा खातीर शुक्रारा दत्तगड, उसगांव आनी कुर्टी वाठारांनी खर पुलीस बंदोबस्त दवरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
