भांगरभूंय | प्रतिनिधी
नवी दिल्ली, खबरां संस्था ः राष्ट्रीय पात्रताय आनी प्रवेश परीक्षा (NEET) स्पेशॅलिटी काउन्सलिंग ची तिसरी फेरी आयोजीत करची आनी तातूंत आमकां वांटो घेवपाचे निर्देश दिवचे, जाका लागून आमकां बऱ्या संस्थांनी प्रवेश मेळटलो आनी आमच्या आवडीचे अभ्यासक्रम वेंचूंक शकतले अशी विनवणी करून 13 दोतोरांनी याचिका दाखल केल्या. हे याचिकेचेर सर्वोच्च न्यायालयान केंद्र सरकार आनी हेरांक नोटीस जारी केल्या.
फाटल्या वर्सा सप्टेंबरांत जाल्ले नीट- स्पेशॅलिटी 2023-24 प्रवेश परिक्षेंत अखिल भारतीय कोटा खातीर पात्र थारल्या उपरांत काउन्सलिंगच्या पयलें आनी दुसरे फेरये उपरांत वेगवेगळ्या स्पेशॅलिटी अभ्यासक्रमांत तांकां सुवाती वांटून दिल्ल्याचें सांगपी दोतोरांच्या याचिकेचेर सुनावणी करपाचे न्यायाधीश बी. आर. गवई आनी न्यायाधीश संदीप मेहता हांच्या खंडपिठान मान्य केलें. केंद्रीय सरकार, दिल्लीच्या आयुर्विज्ञान संस्था आनी राष्ट्रीय वैजकी आयोगाक हे याचिकेचेर जाप दाखल करपाक सांगले उपरांत खंडपिठान याचिका सोमारा सुनावणी खातीर दवरलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
