भांगरभूंय | प्रतिनिधी
धर्तरे वेल्या खंयच्याच मनशाक सहजा सहजी दुसर्याचो गुलाम जावपाक आवडना. पूण काय मनीस हे गुलाम जावपाकूच जल्माक आयिल्लें आसतात, ताका कोण कितें करतलो? कारण तांकां स्वताची बुध्द आसना आनी तितली अक्कलूय नासता. सुवार्थी लोक ज्युस्त अशा लोकांक हेरून सारोतेप आपले गुलाम करून सोडटात. प्रत्येक मनशाक स्वाभिमान हो आसपाकूच जाय. स्वाभिमान म्हणजे कुड्डो अंहकार न्हय. स्वाभिमान म्हणजे स्वत्व. आयच्या या युगांत कोणेच कोणाचेर कुड्डो विस्वास दवरचो न्हय, आनी कोणेंच कोणाचे अंधभक्तूय जावचें न्हय. मनीसपणाचे नितीनेम पाळून जण एकल्यान मुक्तपणान आपली जीण जगची. कोणा कडेन भीक मागची पडूंक जायना. स्वताचे अस्तित्व हें स्वताच सिध्द करपाचे आसता म्हणपाचे कोणेंच विसरूंक फावना. मनीस जल्म परत परत मेळना. मनीसपणान वागून ह्याच जल्मांत आमी कर्तुत्व गाजोवंक जाय. पुराय विश्वाचे दोळे दिपकावपी अशें एक तरी काम आमी करपाक जाय, आनी जिणेचे सार्थक करूंक जाय.
कितें आसता दर एका मनशाक दिसता आपूण जो वागता तो सारको आसा. दुसरोच सारको वागना. आपूण केन्नाच चुकना, चुकता तो दुसरो. तो सदांच आपलेंच टुणटुणे वाजयता. कोणाचेच आयकून घेना. पूण केन्ना केन्ना ताचे वागप लोकांक सोड घरच्यांक लेगीत आवडना. अशें कांय विक्षिप्त प्राणी ह्या संवसारांत आसात. तें स्वताकच चड शाणें समजतात. थोड्याच्या जगपाक लाय हळद व्हरून. तांकां आदेल्लें लागना उद्देल्लें. तांकां दिसता हो सगलो संवसार आपणाक लागुनूच चलता आनी ह्या सगल्या जगाची मक्तेदारी म्हजेच कडेन आसा. आपुणूच सर्वज्ञानी कसो ते वागतात. तांकां पळयल्यार कितें म्हणप तेच कळना.
मनशान सदांच पारदर्शी आसचो अशें आमी म्हणटात खरे पूण प्रत्यक्ष कोण तशें आसनात. जें आसतात तांकां संत म्हणू येता. पूण हालिसारां ह्या संतानीय सगलें सोडला. आतां तांकांय राजकारण येवजुपाक लागलां. भगवी वस्त्रां परिधान करप म्हणजे सगल्याचो त्याग करप. भगवी वस्त्रां परिधान केली म्हूण कोण साधू जायनात. पूण आताचे हे बाबा लोक ढोंगी आनी संदिसादू. बरें संत लोक, सज्जन लोक आसा ना अशें न्हय. चडशें ढोंगीच. हांचेर कसो तरी विश्वास दवरप?
हांचे भायल्यान समाजकारण भितरल्यान राजकारण आयज दर एकलो आपलो सुवार्थूच पळयता, भायल्यान आव हाडलो ना तरी भितरल्यान तो कितें येवजिता, आनी ताची दुरदृश्टी कितें आसता हे ताचे ताकाच खबर आसता. लोकांकय बेसबरें खबर आसा. समाजांत आयज दर एकलो आपले मनमर्जेपणान जगताना दिश्टी पडटा. आमी वयलेचाराक कोणाचेरूय कितलेंय प्रेम करूं, पूण चडसो समाज हो नाटकीच वागता. नाटकीच जगता. कोणूच धुतल्या तादळां सारको ना. प्रत्येकाच्या मनांत दुसर्या विशीं नसायेची भावना आसतातच. आमी वयलेचाराक एकामेकांक कितलेय लाळेगोळे लावं. पूण मनांतल्यान आमी तशे वागताच अशें ना. कांय लोक प्रामाणीक आसात.
आयज काल लोकांची अशीं मेन्टलिटी जाल्लीं आसा की कितें म्हणटा तें म्हाकाच मेळपाक जाय. म्हाका सोडून दुसर्याक कितें मेळत जाल्यार म्हाका सोंसना. म्हजी तकली कणकणटा. म्हाका नसाय जाता. असल्या लोकांची भले तो म्हजो कितलोय लागींचो इश्ट आसूं. म्हाका मेळूं ना म्हणजे तो वायटूच. आयज जो समाजांत वेगळ्यावेगळ्या मळांचेर खेव चल्ला ताका इतपार ना. कोणाक आनी कितल्या जणांक कोण कसो सांगतलो?
बाबांनो तुमच्या काळजांत जो दुस्वासाचो कोयर दाटला तो मात्सो साफ करात आनी मात्शें मनीस कशें वागूंक लागात. मनीस खरे उलोवपाक आनी सत्याक तेंकून रावपाक लेगीत भियेवंक लागला. अन्याया आड कोणूच पेटून उठनात. सगले मूग गिळून ओगी रावतात. कोणाक आनी कित्याक भियेतात तेंच कळना. भोळे बाबड्या लोकांक बेठेच वेठीक धरून उपकारना आनी आपले विचार दुसर्याचेर लादूंक फावना. कोण कोणाचेर कसो अन्याय करता हे खबर आसुनूय आमी कांयच करिनात ही आमची फ्राकेत. आमी मजा पळयतात दुसरो कसो फोंडात पडटात तो. पूण आमी एक विसरता आयज ताका तें फाल्यां म्हाकाय हाचो आमकां विसर पडला. मनशाचे जिणेक शिस्त आसप गरजेचे जावन आसा. कारण शिस्तूच मनशाचे जिणेक दिका आनी फुडार दाखयता. शिस्त नाशिल्लो मनीस सगल्याच मळाचेर घाणटा. आनी समाजांत कशाय कसो बेशिस्त कसो वागता आनी समाजाकूय पिड्ड्यार करपाचें काम करता. अशा बेशिस्त मनशा पासून बर्या मनशांनी कुशीक रावपाचे आसता. पूण केन्ना केन्ना आमी आमच्या सुवार्थाक लागून बेशिस्त मनशाकूच पालखेंत बसयतात. मागीर समाजांत मनीसपणाची नितीमत्ता कशी तिगतली?
आयज समाज पुरायपणान रडयांनी खेळपाक लागला. अधर्मान वागपाक लागला. मनीसपणाचें म्हाका कांयच पडून गेल्लें ना. कोणेंय कितेंय म्हणूं म्हाका कसलोच फरक पडना. कारण जात म्हजी शेड्ड्याची आनी कात गेंड्याची जाल्या. म्हाका फक्त पयसो मेळ्ळो की जालें. पूण अधर्मान जोडिल्लो पयसो मनशाक सूख दिता व्हय? पापा करून जोडिल्लो पयसो पुण्य दिता व्हय? चिंतनाचो विशय. विचार मंथन करपाची गरज आसा.
काशिनाथ नायक
91583 45844
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
