भांगरभूंय | प्रतिनिधी
म्हादय न्हंयेंत बुडपी दोगांचो जीव वाटायिल्लो
भांगरभूंय | प्रतिनिधी
पणजीः स्वताचो जीव धोक्यांत घालून दुसर्याचो जीव वाटावप ही खूब धाडसाची गजाल. अशेंच धाडसाचें काम नाणूस- बेतकेकारवाड्यार रावपी साहील भिसो लाड हांणी केलां. साहील लाड हांणी स्वताचो जीव धोक्यांत घालून म्हादय न्हंयेंत बुडपी दोग नेण्ट्या चल्यांचो जीव वाटायल्ले खातीर ताका राष्ट्रीय पांवड्यार ‘राष्ट्रीय शौर्य पुरस्कार’ जाहीर जालां. प्रजासत्ताक दिसा हें पदक ताका भेटयतले.
बिरेस्तारा राष्ट्रपतींनी 31 जाणांक ‘शौर्य पुरस्कार’ जाहीर केले. तातूंत 3 सर्वोत्तम शौर्य पुरस्कार, 7 उत्कृश्ठ शौर्य पुरस्कार आनी 21 शौर्य पुरस्कार हांचो आस्पाव आसा. हातूंत तीग जाणांक मरणोत्तर पुरस्कार भेटयतले. 7 उत्कृश्ठ शौर्य पुरस्कारां मदीं गोंयच्या साहील लाड हाच्या नांवाचो आस्पाव आसा. 9 नोव्हेंबर 2021 ह्या दिसा साहिलाची आवय रंजना आनी भयण श्रद्धा हीं दोगांय म्हादय न्हंयचे देगेर कपडे धुतालीं. तेन्ना इम्रान (13), रेहान (10) आनी असिफ शेख (16) हें तिगूय भाव न्हांवपा खातीर न्हंयेंत देंवले. अचकीत हे भुरगे उदकांत बुचकळपाक लागले. तें रंजना हांणी पळयलें. तांणी आपल्या 17 पिरायेच्या चल्याक म्हणल्यार साहिलाक आपोवन त्या बुडटल्या भुरग्यांक वाटावपाक सांगलें. साहीलान धांवत येवन न्हंयेंत उडी मारली. तेन्ना ते तिगून भुरगे न्हंयचे मदीं पाविल्ले. ते तिगून व्हांवतूच वताले. साहिलान स्वताच्या जिवाची पर्वा करिनासतना असिफ शेख आनी रिहान शेख ह्या दोगांयकूय भायर काडले. मात इम्रान हाका बुडून मरण आयलें.
तेन्ना वाळपयच्या सरकारी उच्च माध्यमीक विद्यालयांत बारावेक शिकपी साहिलान दोगां भुरग्यांचो जीव वाटायलो. ताका लागून वाळपयच्या लोकांनी ताका शौर्य पुरस्कारान सन्मानीत करपाची मागणी राज्य सरकारा कडेन केल्ली. आतां ताका राष्ट्रीय पांवड्यार ‘शौर्य पुरस्कार’ फावो जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
