भांगरभूंय | प्रतिनिधी
6 फेब्रवारीचें कामकाज जातलें 10 फेब्रुवारीक
भांगरभूंय । प्रतिनिधी
पणजीः मुख्यमंत्री डॉ. प्रमोद सावंत हे 2024- 2025 वर्साचो अर्थसंकल्प 8 फेब्रुवारीक विधानसभेंत सादर करतले. मुख्यमंत्री डॉ. प्रमोद सावंत हांणी कामकाज सल्लागार समितीचे बसके उपरांत ही म्हायती दिली.
विधानसभेचे अर्थसंकल्पी अधिवेशन 2 फेब्रुवारी ते 10 फेब्रुवारी मेरेन जातलें.
प्रधानमंत्री नरेंद्र मोदी हांचे गोंय भेटीक लागून मंगळारा 6 फेब्रुवारीक अर्थसंकल्प अधिवेशनाचें कामकाज जावचें ना. 6 फेब्रुवारीचें कामकाज 10 फेब्रुवारीक जातलें. कामकाज सल्लागार समितीचे बसकेत हो निर्णय जाला.
बसके उपरांत आमदार विजय सरदेसाय हांणी ही म्हायती दिली. हाका लागून अर्थसंकल्पी अधिवेशन आतां 2 फेब्रुवारी ते 10 फेब्रुवारी मेरेन चलतलें. सध्या दिसाक 15 अतारांकित प्रस्नांच्यो जापो सरकार दिता. हे प्रमाण 15 वयल्यान 25 करपाची मागणी विरोधी आमदारांनी केली. तशेंच दिसाचे प्रस्न आनी जापो 48 वरां पयलीं आमदारांक मेळटस्यो, अशी वेवस्था करपाची मागणी आमदारांनी केल्या. फुडलें अधिवेशन 6 म्हयन्यांनी जातलें. अधिवेशनाचो कालावधी वाडोपाची मागणी विरोधी आमदारांनी केल्या, अशें विरोधी पक्ष फुडारी युरी आलेमाव हांणी सांगलें. तशेंच आमदारांक अधिवेशनांत फाटल्या 5 वर्सांची म्हायती मेळटा. म्हायती हक्क कायद्या खाला लेगीत 5 वर्सां परस चड वर्सांची म्हायती मेळटा. अधिवेशनांत 5 वर्सां परस चड वर्सांची म्हायती दिवची, अशी मागणी जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
