भांगरभूंय | प्रतिनिधी
राज्यपालः मडगांवां मनयलो राष्ट्रीय मतदार दीस
भांगरभूंय । डीआयपी
पणजीः भारतीय वेंचणूक आयोगाची कार्यक्षमता आनी सत्यतायेची तोखणाय करतना राज्यपाल पी. एस. श्रीधरन पिल्लई हांणी लोकशायेचें मर्म देशाचे मुक्त आनी न्याय्य वेंचणूक प्रक्रियेंत आसा, अशें सांगलें. देशान लोकशाय प्रक्रियेंत सदांच मतदारांची तांक पळयल्या. लोकांनी राजकी बदल घडोवपा वांगडाच ताचें स्वातंत्र्य राखून दवरलां, अशें राज्यपालान सांगलें.
मडगांवच्या मुख्य वेंचणूक अधिकारी कार्यालयांत दक्षीण जिल्हो वेंचणूक अधिकाऱ्याच्या कार्यालयाच्या पालवान उत्तर गोंय जिल्हो पांवड्यार बिरेस्तारा राष्ट्रीय मतदार दीस कार्यावळ आयोजीत केल्ली. हे कार्यावळींत राज्यपाल उलयताले.
देशांत सांस्कृतीक आनी भाशीक विवीधताय आसून लेगीत आयज संवसारांत भारतीय लोकशाय वेवस्था तायट मानेन उबी आसा. वेंचणूक आयोग राष्ट्राची एकात्मता आनी सार्वभोमत्वाक उर्बा दिवपाचें काम करता. गोंयांत दरेके वेंचणुकेंत मुक्त आनी नितळ वातावरणांतली वेंचणूक पळोवपाक मेळटा, अशें राज्यपालान सांगलें.
नव्या मतदारांक परबीं दिवन युवा मतदारांनी आपलो मतदानाचो हक्क वापरपाचो आनी लोकशाय घटमूट करपाचें योगदान दिवचें, असो राज्यपालान उलो मारलो.
प्रधान वित्त सचीव डॉ. व्ही. कांदेवेलू हांणीय आपल्या उलोवपांत मुक्त आनी न्याय्य वातावरणांत वेंचणूक प्रक्रिया पुराय करचे खातीर वेंचणूक आयोगा कडल्यान जावपी यत्नांची तोखणाय केली.
ह्या वेळार राज्यपाला हस्तुकीं वेंचणूक प्रक्रियेंत समर्पीत भावनेन सेवा करपी अधिकाऱ्यांचो सत्कार केलो.
राज्य वेंचणूक आयुक्त डब्ल्यू. व्ही. रमणमुर्ती हेवूय ह्या वेळार हाजीर आशिल्ले. मुख्य वेंचणूक अधिकारी रमेश वर्मा हांणी मानेस्तांक येवकार दिलो. दक्षीण गोंय जिल्होधिकारी अश्वीन चंद्रू हांणी उपकार मानले. डॉ. रुपा च्यारी आनी गोविंद भगत हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
