भांगरभूंय | प्रतिनिधी
जमावान केलो गॅरेज कामगाराक मारपेट, मोटारीची तोडफोड
भांगरभूंय । प्रतिनिधी
फोंडें: म्हाड्डोळच्या जायांच्या मळ्याक अज्ञातांनी उजो लायिल्ल्यान जायांच्या पिकाचेर फुडारांत गंभीर परिणाम जावपाची शक्यताय आसा. उजो लागपाची घडणूक बुधवारा दनपारा घडली. त्याच वाठारांतले एके गॅरेजींतल्या कामगाराक जमावान मारपेट केल्ल्यान तशेंच मोटारीची तोडफोड केल्ल्यान हें प्रकरण तापपाची शक्यताय उक्तायतात. मात बिरेस्तारा सांजे उसरां मेरेन पुलीस कागाळी जावंक नात.
म्हाड्डोळचो नामनेचो उत्सव म्हूण दर वर्सा महालसा देवस्थानांत जायांची पुजा भक्तीभावान मनयतात. पोरूं 111 वी जायांची पुजा मनयल्ली. बुधवारा दनपारां थळाव्या लोकांच्या जायांच्या मळ्यांक अज्ञातांनी उजो लायलो. ताका लागून दोंगराळ वाटारांतली चंद्रावती नायक, कालिदास नायक, लता नायक, डॅनी नायक, उदय नायक, रमेश नायक, तलाश नायक, राजेंद्र नायक, विनायक नायक हांचे मालकीचे जायांचे मळे पुराय लासून गेले. म्हायती मेळ्ळे उपरांत जायांच्या मळ्यांच्या धनयांनी स्वता वचून उजो पालयलो.
मजगतीं, त्याच वाठारांतले एके गॅरेजींतलो कामगार विकास कनोजिया हाका जमावान मारपेट केलो. जखमी अवस्थेंत ताका फोंडेंच्या उपजिल्हो हॉस्पिटलांत दाखल केलो. त्या वेळार गॅरेजींत पार्क केल्ले एका पंचाचे मोटारीची जमावान तोडफोड केली.
रमेश नायक हांणी सांगलें, कितलेशेच जाण जायांच्या मळ्यांचेर निंबून आसात. फाटल्या कांय वर्सां सावन मळ्यांक उजो लावपाचे प्रकार घडटात. बुधवारा लेगीत अज्ञातांनी मळ्यांक उजो लावन लुकसाण केलां. हे आदीं पुलीस तसेंच थळावे पंचायतींत कागाळी दिल्ल्यो. उजो लावपा फाटल्यान बिगर गोंयकारांचो हात आसपाची शक्यताय अदीक आसा, अशें तांणी सांगलें. उदय नायक हांणी सांगलें, कांय कुटुंबां जायांच्या मळ्याचेर घर संवसार चलयतात. वर्सांतल्यान 3 म्हयनेच पूण व्हड प्रमाणांत जायांचें पीक मेळटा. मळ्यांक उजो लायिल्ल्यान महालसा देवीचे जायांचे पुजेक फुडारांत आडखळ निर्माण जावपाची शक्यताय आसा. मळे पुराय लासून गोबर जाल्ल्यान फुडारांत लेगीत जायांचे पुजेचेर लेगीत परिणाम दिसतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
