भांगरभूंय | प्रतिनिधी
पणजी : स्वताचो जीव धोक्यांत घालून दुसर्याचो जीव वाटावप ही खूब धाडसाची गजाल. अशेंच धाडसाचें काम नाणूस- बेतकेकरवाड्यार रावपी साहिल भिसो लाड हांणी केलां. साहील लाड हांणी स्वताचो जीव धोक्यांत घालून म्हादय न्हंयेंत बुडपी दोग नेण्ट्या चल्यांचो जीव वाटायल्ले खातीर ताका राष्ट्रीय पावंड्यार ‘उत्तम जीवन रक्षा पदक’ जाहीर जालां. फाल्यां प्रजासत्ताक दिसा हें पदक ताका भेटयतले.
आयज राष्ट्रपतींनी ३१ जणांक ‘जीवन रक्षा पदक पुरस्कार’ जाहीर केले. हातूंत ३ सर्वोत्तम जीवन रक्षा पदक, ७ उत्कृश्ठ जीवन रक्षा पदक आनी २१ जीवन रक्षा पदक हांचो आसपाव आसा. हातूंत तीग जाणांक मरणोत्तर पुरस्कार भेटयतले. ७ उत्कृश्ठ जीवन रक्षा पदकां मदीं गोंयच्या साहिल लाड हाच्या नांवाचो आसपाव आसा.
हे खातीर साहिलाक मेळ्ळें पदक
ही घडणूक ९ नोव्हेंबर २०२१ दिसा जाल्ली. साहिलाची आवय रंजना आनी भयण श्रद्धा हीं दोगांय म्हादय न्हंयचे देगेर कपडे धुतालीं. तेन्ना इम्रान (१३), रेहान (१०) आनी असिफ शेख (१६) हें तिगून भाव न्हांवपा खातीर न्हंयत देंवले. अचकीत हे भुरगे उदकांत बुचकळपाक लागले. तें रंजना हांणी पळयलें. तांणी आपल्या १७ पिरायेच्या चल्याक म्हळ्यार साहिलाक आपोवन त्या बुडटल्या भुरग्यांक वाटावपाक सांगलें. साहील धांवत येवन तांणी न्हंयत उडी मारली. तेन्ना ते तिगून भुरगे न्हंयचे मदीं पाविल्ले. ते तिगून व्हांवतूच वताले. साहिलान स्वताच्या जिवाची पर्वा करिनासतना असिफ शेख आनी रिहान शेख ह्या दोगांयकूय भायर काडले. मात इम्रान हाका बुडून मरण आयलें.
तेन्ना वाळपयच्या सरकारी उच्च माध्यमीक विद्यालयांत बारावेक शिकपी साहिलान दोगां भुरग्यांचो जीव वाटायलो. ताका लागून वाळपयच्या नागरिकांनी ताका शौर्य पुरस्कारान सन्मानीत करपाची मागणी राज्य सरकारा कडेन केल्ली. आतां ताका विनंती राज्य सरकारकडे केली होती. आता ताका राष्ट्रीय पांवड्यार ‘जीवन रक्षा पदक पुरस्कार’ फावो जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
