भांगरभूंय | प्रतिनिधी
म्हापशें: आजरा कोल्हापूरा नवनाट्य कलामंच संस्था आयोजीत 10 व्या सर्गेस्त रमेश टोपले यादस्तीक राज्य पांवड्या वेल्या नाट्य महोत्सवांत दिवचलच्या वैभवी क्रिएशन निर्मीत अग्गबाई सासूबाई ह्या विनोदी नाटकाक दुसरें इनाम फावो जालें. तशेंच तीन वैयक्तीक इनामांय फावो जालीं.
वैयक्तीक इनामां मदीं उत्कृश्ट दिग्दर्शन शेखर उसगांवकार (तिसरें), उत्कृश्ट बायल कलाकार – मारीटा डिसोझा (तिसरें), उत्कृश्ट दादलो कलाकार- नितीन रावळ (तिसरें) हांचो आस्पाव आसा.
हो नाट्य महोत्सव फाटल्या 14 ते 21 जानेवारी मजगतीं जालो. हातूंत अग्गबाई सासूबाई सयत कालिका थिएटर्स कळंगूट प्रस्तूत सूर राहू दे, गेमीक इंडिया कोल्हापूर प्रस्तूत स्पायडर मॅन, जाणीव चॅरिटेबल फावंडेशन कोल्हापूर प्रस्तूत सारी रात्र, जागृती नाट्य कलामंच, कुसवडे (सातारा) प्रस्तूत आम्ही दोघेच रहायचो घरात, अभिव्यक्त निर्मीत बटरस्कॉच, लोकरंगभूमी शांतिनिकेतन, सांगली निर्मीत ओ अॅ सि स आनी नवनाट्य कलामंच संस्था आजरा निर्मीत घरोघरी बोंबाबोंब हीं नाटकां सादर केलीं.
अग्गबाई सासूबाई ह्या नाटकाचे आतां मेरेन 70 प्रयोग जाल्यात. वयल्या नाट्य महोत्सवांत दुसरें इनाम फावो जाल्ले खातीर नाट्य रसिकां कडल्यान नाटकाची तोखणाय जाता. ह्या नाटकाचे मूळ लेखक महेश चंद्रकांत नायक आसून अनुवाद चिन्मय किनळेकार, दिग्दर्शन शेखर उसगांवकार हांणी केलां.
हातूंत दामोदर पटेकार, शुभम हळदणकार, मारिटा डिसोझा, अमर फाळकार आनी नितीन रावळ हांणी भुमिका केल्यात. पार्श्वसंगीत आनी रंगभुशा संजय नंदा फाळकार, ध्वनी संकलन हैदर अली जमादार, प्रोपोएटर राज सावंड, उजवाडा येवजण गजानन भाऊ नायक, वेशभुशा नितीन रावळ, नेपथ्य श्रीलक्ष्मी रंगमंच, मुळगांव हांचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
