भांगरभूंय | प्रतिनिधी
भांगरभूंय । डीआयपी
पणजीः केंद्रीय संरक्षण मंत्रालयान नवी दिल्लीच्या लाल किल्ल्या सामकार प्रजासत्ताक दीस संचालनाचे आदीं आयोजीत केल्ल्या भारत पर्व उत्सवाक बुधवारच्यान सुरवात जाली. विवीधतायेंत एकता ह्या भारतीय भावनेचो सुवाळो मनोवचे खातीर आनी ह्या देशभक्तीच्या उत्सवांतल्यान देशाचे गिरेस्त आनी विविधतायेचचे संस्कृतीचें दर्शन घडोवपाच्या उद्देशान आयोजीत भारत पर्व उत्सवाचें उक्तावण प्रधानमंत्री नरेंद्र मोदी हांचे हस्तुकीं जालें. ह्या उत्सवांत गोंयचो चित्ररथ प्रदर्शीत जालो.
भारत पर्व उत्सवांत विकसीत गोंय, विकसीत भारत हे संकल्पनेचेर आदारीत गोंयचो चित्ररथ तपलोका योग क्षेत्र, गोंयची दर्या संपत्ती, जल जीवन मिशन आनी हेर दायजाचें दर्शन घडयता. फोंडें वाठारांतले नामनेचे कलाकार सुशांत खेडेकार हांणी तयार केल्लो हो चित्ररथ 31 जानेवारी मेरेन नवी दिल्लींत भारत पर्व उत्सवांत प्रदर्शीत करतले.
भारत पर्व उत्सवांत गोंया सयत आसाम, कर्नाटक, उत्तराखंड, त्रिपुरा, हिमाचल प्रदेश, जम्मू आनी काश्मीर राज्याचो चित्ररथ प्रदर्शीत केला. भारत पर्व उत्सवांत चित्ररथ प्रदर्शना सयत अन्न उत्सव, हस्तकला मेळा, लोकनाच आनी हेर कार्यावळी जातल्यो.
अंदूंच्या प्रजासत्ताक दीस संचलनांत देशांतल्या 16 राज्यांचे आनी 9 मंत्रालयांचे चित्ररथ वांटो घेतले. प्रजासत्ताक दीस संचलना उपरांत हेवूय चित्ररथ भारत पर्व उस्तवांत प्रदर्शीत करतले. गोंय सरकाराच्या म्हायती आनी प्रसिद्धी खात्या वतीन भारत पर्व उत्सवांत गोंयचो चित्रपथ प्रदर्शीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
