भांगरभूंय | प्रतिनिधी
अमीत पाटकारः नाजाल्यार रास्ता रोको करपाची शिटकावणी
भांगरभूंय । प्रतिनिधी
पेडणें: 6 फेब्रुवारीक प्रधानमंत्री गोंयांत येतात. ते येवचे आदीं जर उगवे वाठारांतले सर्वीस रस्ते जाले नात जाल्यार राष्ट्रीय म्हामार्ग आडायतले, अशी शिटकावणी काँग्रेसीचे प्रदेशाध्यक्ष अमीत पाटकार हांणी दिली.
पेडणें म्हालांतल्या राष्ट्रीय म्हामार्ग 66 चें काम आनी रुंदीकरण करतना थळाव्या लोकांनी, थळावे सरपंच आनी समाजीक संस्थांच्या पदाधिकाऱ्यांनी सर्वीस रस्त्याची परतून परतून मागणी केली, सरकाराक निवेदनां दिलीं. राष्ट्रीय म्हामार्ग करतना थळाव्या पंचायतींक विस्वासांत घेयात, थळाव्यांक विस्वासांत घेवन काम करात, राष्ट्रीय म्हामार्ग बांदचे आदीं गांवागांवांक जोडपी सर्वीस रस्ते, भुंयगत पूल, जंक्शनांचेर डिव्हायडर, अशीं कामां हातांत घेवची, अशी मागणी केली. पूण आयज मेरेन कंत्राटदारान मनमानी कारभार चलयला. ताका लागून हो रस्तो घातक जाला. हे खातीर थळाव्या लोकांनी थंयची परिस्थिती पळोवचे खातीर अमीत पाटकार आनी थळाव्या काँग्रेस फुडाऱ्यांक आपयिल्ले. ह्या वेळार पेडणें गट काँग्रेस अध्यक्ष कृष्णा नायक, सरचिटणीस अॅड. जितेंद्र गांवकार, थळावे कार्यकर्ते उदय महाले, उत्तर गोंय सरचिटणीस प्रणव परब, आदले सरपंच विनायक महाले, आदले पंच विठू महाले आनी हेर कार्यकर्ते हाजीर आशिल्ले.
सुरवेक अमीत पाटकार हांणी लोकांच्यो समस्या आयकून घेतल्यो. उपरांत प्रत्यक्ष वचून रस्त्याची पळोवणी केली.
एमजीआर कंपनीचे कंत्राटदार सरकाचे जावंय आशिल्ल्यान तांच्या मनमानी कारभाराक सरकार तेंको दिता, असो आरोप पाटकार हांणी केलो. सरकार वेगवेगळे तरेचे घोटाळे करता. राष्ट्रीय म्हामार्ग होवूय एक व्हड घोटाळो आसा. ह्या घोटाळ्याची चवकशी करपाची गरज आसा, अशें तांणी सांगलें.
उगवें वाठारांत 500 परस चड शेतकारांची तेरेखोल न्हंय वाठारांत व्हड प्रमाणांत शेतां आसात. ह्या शेतांनी वतलो जाल्यार सर्वीस रस्ते ना. हाका लागून शेतकार तीं शेतां पडीक दवरतले. सरकारन काडिल्ल्या नव्या कायद्या प्रमाण शेतकारांनी शेतां पडीक दवरलीं जाल्यार तीं सरकार ताब्यांत घेतले. फुडारांत ही सगळी जमीन ताब्यांत घेवपाचो सरकाराचो विचार आसा. हेच खातीर सरकार सर्वीस रस्तो आनी शेतांनी वचपा खातीर पांयवाटो वेवस्थीत करिनात, अशें पाटकार हांणी सांगलें.
विरोधी पक्ष म्हूण काँग्रेस खंयतरी उणो पडटा. पत्रकारांनी आवाज काडले उपरांत सरकाराक जाग येता, असो दावो उमेश गाड हांणी केलो. हाका जाप दितना अॅड. गांवकार हांणी सांगलें, ज्या ज्या वेळार पेडणेंकारांचेर अन्याय जाला त्या त्या वेळार काँग्रेस पक्ष रस्त्यार देंवला. लोकांनीय आमकां तेंको दिला. ह्या वेळार कृष्णा नायक, अॅड. गांवकार, प्रणव परब हांणीय विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
