भांगरभूंय | प्रतिनिधी
२ फेब्रुवारीक ईव्हीएम डेमो विशींच्यो दोन सभा
मडगांव, प्रतिनिधी : देशांत वेंचणुके वेळार ईव्हीएम वापरचें न्हय म्हणून दिल्लींच्यान चळवळ सुरू जाल्या. ताका गोंयांतूय फाटबळ दिलां. आतां शासन पांवड्यार निवेदन दिवंक ना. ह्यान फुडें ईव्हीएमच्या गैर वापराचे डेमो आनी म्हायती दिवपी सभा २ फेब्रुवारीक दक्षीण आनी उत्तर गोंयांत जातल्यो, अशी म्हायती शेख हसन मन्सूर हांणी दिली.
दक्षीण गोंयच्या सावथ गोवा लोक सभा पॉलिटी ह्या नांवान दक्षीण गोंयच्या सिव्हील सोसायटी ग्रुपा वतीन दक्षीण गोंय जिल्होधिकारी अश्विन चंद्रू हांकां येवपी वेंचणुकांनी ईव्हीएमचो वापर करचो न्हय हे विशीं निवेदन सादर केलें. उपरांत जॅक मास्कारेन्हस हांणी, दिल्लीच्या सर्वोच्च न्यायालयाचे वकील भानुप्रताप, महमूद प्रजा हांणी ‘ईव्हीएम हटाव देश बचाओ’ ही चळवळ सुरु केल्या. ईव्हीएमाचेर आजूनय लोकांचो पुरायेन विस्वास ना. तांच्या मनांत अजूनय दुबाव आसा. राजस्थानच्या वेंचणुकां वेळार ईव्हीएमांत १०० मतां केलें जाल्यार मेजल्या उपरांत तीं १२० मतां नोंद जाल्लीं दिसलीं. ते सुवातेर वेंचणूक आयुक्ता कडेन कागाळ करून लेगीत कांय जावंक ना. ताका लागून न्यायालयांत गेले. म्हणून हे चळवळी फाटल्यान गोंयचे नागरीक उबे रावतात, अशें सांगलें.
बॅलेट युनीट, व्हीव्हीपॅट आनी कंट्रोल युनीट हांची वळेरी पळयल्यान खुबशे दुबाव येतात. ज्या देशांनी ईव्हीएमाचो सोद लायलो त्या देशांतूय ईव्हीएम सारक्या इलेक्ट्रॉनीक वस्तूचो वापर मतदाना खातीर करिना. अशें आसतना भारतांत ईव्हीएम परत परत कित्याक वापरता असो प्रस्न अँथनी डिसिल्वा हांणी केलो. मतपत्रिकेचो वापर वेंचणुकां खातीर करचो अशी मागणी तांणी केली.
शेख हसन मन्सूर हांणी, दिल्लीच्या कांय वकिलांनी ईव्हीएम आड चळवळ सुरु केली. तांकां गोंयच्यान फाटबळ दितात. आतां ईव्हीएमचो वापर गोंयांत वेंचणुके वेळार करचो न्हय हाचे खातीर निवेदन सादर केलां. उपरांत ईव्हीएमचो गैरवापर कसो करूं येता, हाची म्हायती जनतेक दितले. ताका लागून २ फेब्रुवारीक दोन सुवातांचेर कार्यावळी जातल्यो. ईव्हीएम बंद जायमेरेन ही चळवळ चालूच उरतली अशें स्पश्ट केलें.
जॉन नाझारेथ हांणी, देशाचो नागरीक म्हणून मतदानाचो हक्क आसा. ईव्हीएमा वरवीं केल्लें मतदान योग्य व्यक्तीक वता काय ना हाची खात्री मेळना. ईव्हीएम करपी देश हें मशीन मतदाना खातीर वापरिनात. ताका लागून देशांतल्यो सगळ्यो वेंचणुको ह्या मतपत्रिकेचेर घेवच्यो. ताका लागून लोकांच्या मनांत कसलोच दुबाव उरचो ना. लोकांच्या मतप्रवाहा आड निकाल अयिल्ल्यान हो दुबाव आनीक वाडटा, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
