भांगरभूंय | प्रतिनिधी
नवी दिल्ली, खबरां संस्था ः जायते शेतकार आतां शेतवडी वांगडाच वेवसाय म्हणून नुस्तें पोसपाक लागल्यात. हाचे वरवीं शेतकारांक भरपूर अर्थीक फायदोय मेळटा. केंद्र सरकारा सयत वेगवेगळ्या राज्य सरकारांनी नुस्तेंमारीक उर्बा दिवपाचें काम सुरू केलां. हाचे भायर शेतकारांक नुस्तेंमारी खातीर सरकार अनुदानय दिता. पूण, नुस्तेंमारी करचे पयलीं शेतकारांनी ताचे जाती विशीं जाणून घेवपाक जाय. कारण बऱ्या जातीचें नुस्तें पोसल्यारूच तांकां बाजारांत बरें मोल मेळटलें. अशें एक नुस्तें आसा जाची बाजारांत हजारांनी न्हय तर लाखांनी रुपयांचें मोल आसा.
भारतांतलो सगळ्यांत मोलादीक नुस्तें ‘घोळ’. ह्या नुस्त्यांत जायते गूण आसतात, जे भलायकेचे नदरेन आनी रुचीचे नदरेन व्हड मानतात. घोळ नुस्तें भारतांतल्या सगळ्या नुस्त्यां मदलें एक व्हड नुस्तें. गुजरात आनी महाराष्ट्रांतल्या दर्या वाठारांनी तें खूब प्रमाणांत मेळटा. ताचो रंग थोडो भांगरा रंग आनी कांशें तांब्या भशेन आसता. ताची रुच आनी भलायकेच्या गुणधर्मांक लागून ह्या नुस्त्याक व्हड प्रमाणात मागणी आसा.
घोळ नुस्त्याचें मोल बरें आसा. ह्या एका नुस्त्याचें मोल सुमार 5 लाख रुपया आसा. कारण ह्या नुस्त्या पसून जायते पदार्थ तयार करतात. तशेंच बियर आनी वायन तयार करपाकय ताचो उपेग करतात. इतलेंच न्हय तर तातूंत मेळपी एअर ब्लॅडरचो उपेग वखदां तयार करपाक जाता. ह्या नुस्त्याचें मांस आनी मुत्राशय विकतात. ताच्या मुत्राशयाची निर्गत जायत्या देशांनी जाता. देखून नुस्तें पोसपाचें आसल्यार हें नुस्तें दवरूं येता.
घोळ नुस्त्याक राज्य नुस्त्याचो दर्जो…
घोळ नुस्त्याची वाडत वचपी लोकप्रियते उपरांत 2023 वर्सा ताका गुजरातांतलें ‘राज्य नुस्तें’ म्हूण जाहीर केलां. ते भायर अहमदाबादच्या सायन्स सिटी हांगा जाल्ल्या दोन दिसांच्या ग्लोबल फिशरीज कॉन्फरन्स इंडिया 2023 हातूंत ताका राज्य नुस्तें म्हूण जाहीर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
