16 खून केल्लो आरोपी 808 वर्सां बंदखणींत

भांगरभूंय | प्रतिनिधी

ग्वाटेमाला, खबरां संस्था ः निकाराग्वासावन ग्वाटेमालाक एक बस वता. तातूंत एक ड्रायव्हर, एक कंडक्टर आनी 14 प्रवासी आसतात. ग्वाटेमाला शिम हुंपताच ते बसीचे अपहरण जाता. ड्रग्स तस्करी करपी अनवळखी लोक बशींत चडटात. तांचे मदीं तांचो फुडारी रिगोबेर्टो डॅनिलो मोरालेस तांचे वांगडा आशिल्लो.
2008 वर्साची ही घडणूक. रिगोबेर्टोन बशींतल्या सगळ्या 16 जाणांक एक- एक करून फारान मारता. उपरांत तो ती बस दुसरे सुवातेर व्हरता आनी सगळ्यो कुडी उज्यांन लासून उडयता. हे घडणुकेच्या 16 वर्सां उपरांत म्हळ्यार 23 जानेवारी 2024 दिसा ग्वाटेमाला न्यायालयान रिगोबेर्टो डॅनिलो मोरालेसाक 808 वर्सां बंदखणीची ख्यास्त फर्मायल्या. रिगोबेर्टोक दरेक खूना फाटल्यान 50 वर्सां बंदखणीची ख्यास्त फर्मायल्या. हाचो अर्थ तो 16 खून प्रकरणांत 800 वर्सां बंदखणींत उरतलो. जाल्यार उरिल्लीं 8 वर्सांची ख्यास्त गुन्यांवकारी कृत्यां खातीर दिल्या.

साथीदारांकय ख्यास्त….

2008 वर्सा रिगोबेर्टो डॅनिलो मोरालेस आनी ताचे वांगडी ड्रग्स चोरपाच्या हेतान बशींत चडले. एएफपी खबरां प्रमाण निकाराग्वा सावन ग्वाटेमाला वचपी बशींत ड्रग्स आशिल्ल्याची म्हायती मोरालेसाक मेळ्ळी. ते चोरपाक इश्टां वांगडा तो बशींत चडलो. पूण बशींत ड्रग्स मेळूंक नाशिल्ल्यान ताणें बशींतल्या सगळ्या प्रवाशांक मारून उडयले.
16 जाणांक मारले उपरांत ताणें तांचीं मडीं ताचो इश्ट आनी वेवसायीक भागीदार मार्विन मॉन्टिएल मॅरिनाचे सुवातेर लिपोवन दवरलीं. आनी थंय ताणें बशी सयत सगळी मडीं जाळली. हे घडणुके कडेन संबंदीत आशिल्ल्या सगल्या आरोपींक न्यायालयान खर ख्यास्त फर्मायल्या. पूण रिगोबेर्टो सोडून हेर कोणाकूय ख्यास्त दिवपा विशीं खंयचीच म्हायती उक्ती जावंक ना.

मोरालेसाक 14 वर्सां उपरांत पुलिसांनी धरलो…

मोरालेस 2008 वर्सा 16 जाणांक जिवेशीं मारून तांचीं कुडीं जळोवन पळून गेलो. ग्वाटेमाला पुलीस 14 वर्सां ताका धरूंक शकले ना. 2022 वर्सा निमाणे पुलिसांक मोरालेसाक अटक करपाक येस आयलें. त्याच वर्सा ताचे आड न्यायालयात सुनावणी सुरू जाली. आनी आतां दोन वर्सांच्या खटल्या उपरांत ताका ख्यास्त फर्मायल्या.