भांगरभूंय | प्रतिनिधी
नवी दिल्ली, खबरां संस्था: दिल्ली उच्च न्यायालयान एके विधवेक गर्भपात करपाची परवानगी दिवपाचो स्वताचोच निर्णय फाटीं घेतलो. हो निकाल फाटीं घेवचो अशी याचिका केंद्र सरकारान दाखल केल्या उपरांत उच्च न्यायालयान निकाल बदल्लो. भुरग्याक जिवो रावपाचो अधिकार आसा आनी जल्मूंक नाशिल्ल्या बाळकाच्या जिणेचें अधिकाराचें संरक्षण करपाचो न्यायालयान विचार करचो अशें केंद्र सरकाराच्या याचिकेंत नमूद केल्लें.
ह्या प्रकरणांत संबंदीत बायलेक २९ सप्तकांचो गर्भ उडोवपाची परवानगी दिवपी निकाल न्यायालयान ४ जानेवारीक दिल्लो. आतां हो गर्भ ३२ सप्तकांचो आशिल्ल्यान हे २६ पिरायेचे बायलेक प्रसुती खातीर ‘एम्स’ वा हेर केंद्रीय वा राज्य सरकाराच्या हॉटेलांत वचपाक मेळटलें अशें न्या. सुब्रमण्याम प्रसाद हांणी सांगलें. हे बायलेच्या घोवाक फाटल्या वर्सा ऑक्टोबरांत मरण आयिल्लें. ते उपरांत तिका डिप्रेशनाची पिडा जाली. गुरवारपणाक लागून तिच्या मानसीक भलायकेचेर परिणाम जावपाक शकता. तशेंच तिका भुरग्याक जल्माक घालपाचो अधिकार आसा आनी जल्म ना दिवपाचोय अधिकार आसा, अशें न्यायालयान ४ जानेवारीक गर्भपाताची परवानगी दिवपी निकालांत नमूद केल्लें.
बाळंतपणाचो सगळो खर्च संबंदीत सरकार दितलें अशें न्यायालयान सांगलें. तिका जल्माक आयिल्ल्या भुरग्याक दत्तक दिवपाचें आसल्यार केंद्र सरकार सगळी प्रक्रिया सुरळीतपणान आनी रोखडेच हाची खबरदारी घेतले अशेंय न्यायालयान मंगळारा स्पश्ट केलें. ‘एम्स’त संबंदीत बायलेची तपासणी केल्ली. आवय आनी बायकाची भलायकी सुदारपा खातीर गर्भ आनीक दोन ते तीन सप्तकां कायम दवरचो अशें डॉक्टरांनी सुचयल्लें. त्याय अहवालाचेर न्यायालयान विचार केलो.
न्यायालयाचें निरीक्षण
संबंदीत बायलेचे जिणेंत तिचे वांगडा घडिल्ल्या वायट प्रसंगाक लागून ड्रिप्रेशन आयलां. तिका कसलेंच मानसीक दुयेंस ना. ताका लागून सध्याचें गरोदरपण वा प्रसुतीक लागून तिचे मानसीक भलायकेक गंभीर धोको निर्माण जातलो अशें दिसना, अशें उच्च न्यायालयान मंगळारच्या निकालपत्रांत नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
